श्रीनगर - आई ही मुलीची सर्वात जवळची मैत्रीण असते, असे म्हटले जाते. मात्र याच माय-लेकीच्या नात्याला काळिमा फासणारी घटना जम्मू-काश्मीरमध्ये घडली आहे. सावत्र आईनंच 9 वर्षांच्या मुलीवर सामूहिक बलात्कार घडवून आणण्याचा व नंतर तिची निर्घृण हत्या करण्याचा कट रचल्याची हादरवणारी आणि तितकीच चीड आणणारी माहिती समोर आली आहे. या घटनेचा देशभरात निषेध व्यक्त करण्यात येत आहे.
ऑगस्ट महिन्यामध्ये उत्तर काश्मीरमधील बारामुल्ला परिसरात नऊ वर्षांच्या मुलीचा सामूहिक बलात्कार करुन तिची हत्या करण्यात आली होती. मुलीच्या सावत्र भावासह तीन जणांचा या गुन्ह्यामध्ये समावेश होता. मुलीची हत्या केल्यानंतर चाकूनं तिचे डोळे बाहेर काढण्यात आले आणि ओळख पटू नये म्हणून तिच्या शरीरावर अॅसिड ओतून मृतदेह जंगलामध्ये फेकण्यात आला.
पोलीस अधीक्षक इम्तियाज हुसैन यांनी दिलेल्या माहितीनुसार, 23 सप्टेंबर रोजी मुलगी बेपत्ता झाली होती आणि 2 सप्टेंबरला तिचा मृतदेह छिन्हविछिन्ह अवस्थेत जंगलात आढळून आला होता. याप्रकरणी सावत्र आईसहीत तिचा मुलगा आणि त्यांच्या तीन साथीदारांना अटक करण्यात आली आहे. हत्या करण्यात आलेल्या मुलीच्या वडिलांच्या दोन पत्नी होत्या. यातील एक जण मूळची झारखंडची आहे तर दुसरी काश्मीरमधीलच आहे. ज्या मुलीची हत्या करण्यात आली, ती झारखंडमधील पत्नीची मुलगी होती.
पोलिसांच्या चौकशीदरम्यान आरोपी महिलेनं सांगितले की, पती दुसऱ्या पत्नीसोबत अधिक वेळ घालवायचा आणि आपल्या सर्व मुलांमध्ये याच मुलीचे सर्वात जास्त लाड व्हायचे. यामुळे कौटुंबिक तणाव वाढत होता. पतीच्या दुसऱ्या पत्नीबाबत असलेल्या द्वेष भावनेतूनच आरोपी महिला सावत्र मुलीला जंगलात घेऊन गेली. यावेळेस तिनं स्वतःसोबत चाकूही घेतला होता. याच चाकूच्या धाकावर अल्पवयीन मुलीवर सामूहिक बलात्कार करण्यात आल्याची माहिती पोलिसांनी दिली. दरम्यान, घटनास्थळाहून चाकू आणि कुऱ्हाड ताब्यात घेण्यात आली आहे.