दिल्लीच्या प्रदूषण नियंत्रणासाठी ६ समित्या

हिवाळ्यात दिल्ली व राजधानीच्या परिसरात अचानक वाढणारे प्रदूषण नियंत्रित करण्यासाठी केंद्र सरकारच्या नियंत्रणाखाली ६ समित्यांनी काम सुरू केले आहे.

सुरेश भटेवरा नवी दिल्ली : हिवाळ्यात दिल्ली व राजधानीच्या परिसरात अचानक वाढणारे प्रदूषण नियंत्रित करण्यासाठी केंद्र सरकारच्या नियंत्रणाखाली ६ समित्यांनी काम सुरू केले आहे. या समित्यांच्या कामकाजाचे मूल्यमापन व समीक्षा थेट पंतप्रधान कार्यालयातर्फे सुरू आहे, अशी माहिती सूत्रांकडून प्राप्त झाली आहे.दोन वर्षांपासून हिवाळ्याच्या सुरूवातीस दिल्लीचे रूपांतर गॅस चेंबरमधे होते. या समस्येचे निराकरण करण्यासाठी पंतप्रधान कार्यालयाच्या निर्देशानुसार ज्या ६ समित्यांनी आपले काम सुरू केले आहे, त्यात वन व पर्यावरण मंत्रालयाचे सचिव सी.के. मिश्रा यांच्या अध्यक्षतेखाली ७ सदस्यांची विशेष समिती नियुक्त करण्यात आली आहे. प्रदूषणाच्या विविध कारणांचा शोध घेण्यासाठी एक स्वतंत्र समिती काम करते आहे. आसपासच्या राज्यात विविध पिकांचे तण व खोडवा (पराली) जाळण्याला पर्याय शोधून काढण्याचे काम एका समितीवर सोपवण्यात आले आहे.