कुपवाडात घुसखोरी करणाऱ्या पाच दहशतवाद्यांना कंठस्नान

यापूर्वी राजनाथ सिंह यांच्या दौऱ्यावेळी दहशतवाद्यांनी केरन सेक्टरमध्ये हल्ला केला होता.

श्रीनगर: कुपवाडा जिल्ह्यातील केरन सेक्टरमध्ये घुसखोरी करणाऱ्या पाच दहशतवाद्यांना रविवारी भारतीय लष्कराने कंठस्नान घातले. या घटनेनंतर भारतीय लष्कराने या परिसरातील गस्त आणखीनच वाढवली आहे.दोन दिवसांपूर्वीच केंद्रीय गृहमंत्री राजनाथ सिंह यांच्या श्रीनगर व सीमाभागाचा दौरा केला होता. त्यावेळीही केरन सेक्टरमध्ये दहशतवाद्यांनी हल्ला केला होता. त्यावेळी झालेल्या चकमकीत दहशतवादी मारले गेले होते.  रमजानच्या पवित्र महिन्यात सीमेवर गोळीबार न करण्याचा निर्णय भारताने जाहीर केल्यानंतरही पाकिस्तानच्या कुरापती थांबलेल्या नाहीत. केरन सेक्टरमध्ये आज तिसऱ्यांदा पाकिस्तानी अतिरेक्यांनी घुसखोरी करण्याचा प्रयत्न केला होता, तो सुरक्षा दलाने हाणून पाडला.