नवी दिल्ली - भारतीय सेना 15 जानेवारीला 'आर्मी डे' साजरा करणार आहे. या दिवशी विशेष परेडचं आयोजन करण्यात येतं. दरम्यान, 'आर्मी डे' कार्यक्रमाची तयारी करत असलेल्या जवानांसोबत नवी दिल्ली एक अपघात घडला आहे. ध्रुव हेलिकॉप्टरमधून उतरवण्याचा सराव करत असताना 3 जवान अचानक उंचावरुन जमिनीवर पडले. सुदैवानं या घटनेत कोणतीही जीवितहानी झालेली नाही. मात्र या अपघातात जवान जखमी झाले आहेत.
सोशल मीडियावर या घटनेचा व्हिडीओ व्हायरल झाला आहे. ध्रुव हेलिकॉप्टरमधून जवान दोरीच्या सहाय्यानं खाली उतरत असताना एक जवान खाली पडत असल्याचं या व्हिडीओमध्ये दिसत आहे. दोर तुटल्यानं ही घटना घडल्याचे दिसत आहे. अद्यापपर्यंत या अपघातामागील अन्य कोणतेही कारण समोर आलेले नाही. मंगळवारी (9 जानेवारी) ही घटना घडली आहे.