'खराब हेअरकट'च्या बदल्यात २ कोटी! मॉडेलनं मागितली नुकसान भारपाई; सुप्रीम कोर्ट म्हणालं...

केवळ अनुमानांच्या आधारावर, एवढी मोठी नुकसानभरपाई दिली जाऊ शकत नाही, अशी कठोर भूमिका घेत, न्यायालयाने भरपाईची रक्कम २५ लाख रुपयांवर आणली आहे...

एका मॉडेलला 'खराब हेअरकट'च्या मोबदल्यात नुकसान भरपाई पोटी २ कोटी रुपये द्यावेत, असे निर्देश राष्ट्रीय ग्राहक विवाद निवारण आयोगाने (NCDRC) नवी दिल्ली येथील 'आयटीसी मौर्य' हॉटेलला दिले होते. मात्र, NCDRC चा हा आदेश सर्वोच्च न्यायालयाने पुन्हा एकदा रद्द केला आहे. केवळ अनुमानांच्या आधारावर, एवढी मोठी नुकसानभरपाई दिली जाऊ शकत नाही, अशी कठोर भूमिका घेत, न्यायालयाने भरपाईची रक्कम २५ लाख रुपयांवर आणली आहे.

न्यायमूर्ती राजेश बिंदल आणि न्यायमूर्ती मनमोहन यांच्या खंडपीठाने ३४ पानांच्या निकालात म्हटले आहे की, भावनिक तर्क किंवा अनुमानांच्या आधारावर नुकसान भरपाई ठरवली जाऊ शकत नाही. राष्ट्रीय ग्राहक विवाद निवारण आयोगाने (NCDRC) दिलेला २ कोटी रुपयांच्या नुकसानभरपाईचा आदेश रद्द करत, न्यायालयाने ही रक्कम २५ लाख रुपयांवर आणली आहे. एवढ्या मोठ्या रकमेचा दावा असताना आयोगाने पुराव्यांचे गंभीर परीक्षण करणे आवश्यक होते, असेही न्यायालयाने नमूद केले.

नेमकं प्रकरण काय? मॉडेल आणि मॅनेजमेंट प्रोफेशनल आशना राय दिल्लीतील आयटीसी मौर्य हॉटेलमधील सलूनमध्ये हेअरकटसाठी गेली होती. स्टायलिस्टने आपल्या सांगण्यापेक्षा अधिक केस कापले, असा तिचा आरोप होता. यामुळे त्यांना मानसिक धक्का बसला आणि त्यांच्या व्यावसायिक प्रतिमेचे नुकसान झाले. या घटनेमुळे मॉडेलिंग आणि चित्रपटसृष्टीतील अनेक मोठे प्रोजेक्ट्स हातचे गेल्याचा दावाही मॉडेलने केला होता.

पुराव्यांची आवश्यकता  कोर्ट म्हणाले, "ग्राहकाने मानसिक आघाताचा हवाला देऊन मूळ दस्तऐवज सादर न करणे, हा मोठ्या भरपाईचा आधार होऊ शकत नाही. ग्राहक आयोगांवर दिवाणी प्रक्रिया संहिता (CPC) कडकपणे लागू होत नसली, तरी पुराव्यांचे ठोस मूल्यमापन करणे अनिवार्य आहे. 

मानसिक आघाताचा हवाला देत मूळ दस्तावेज सादर करू न शकणे, हे मोठ्या नुकसान भरपाईचा आधार ठरू शकत नाही. एवढेच नाही तर, २ कोटींचे आर्थिक नुकसान नेमके कसे सिद्ध होते? हे स्पष्ट करण्यात आयोग अपयशी ठरल्याचे, न्यायालयाने म्हटले आहे.