दिल्लीतून एक धक्कादायक घटना समोर आली आहे. एका साखपुड्याच्या आनंदाचे शोकात रूपांतर झाले. रविवारी (9 एप्रिल) बादली गावात चुलत भावाच्या साखरपुड्यात डीजेवर नाचत असताना एका तरुणाने जीव गमावल्याची घटना समोर आली आहे. आकाश असं या 19 वर्षीय तरुणाचं नाव असून तो आनंदात नाचत होता. नाचता नाचता अचानक बेशुद्ध झाला. यानंतर कुटुंबीयांनी त्यांना तातडीने रुग्णालयात नेले असता डॉक्टरांनी त्यांना मृत घोषित केले.
डॉक्टरांकडून मिळालेल्या माहितीनुसार, तपासादरम्यान आकाशचा मृत्यू हृदयविकाराच्या झटक्याने झाल्याचे समोर आले. आकाशला कोणताही आजार नसल्याचं त्याच्या कुटुंबीयांनी सांगितलं. यासोबतच पोलीस या प्रकरणाचा तपास करत आहेत. आकाश रविवारी (9 एप्रिल) दुपारी वडील सच्चिदानंद आणि कुटुंबातील इतर सदस्यांसह बादली येथील जेजे कॅम्प येथे चुलत भाऊ इंद्रजीतच्या साखरपुड्यासाठी आला होता. जेवण झाल्यावर तो डीजे फ्लोअरवर डान्स करायला गेला. त्याच्यासोबत इतर लोकही नाचत होते.
नातेवाईकांकडून मिळालेल्या माहितीनुसार, तो खूप खूश होता. नाचत असताना अचानक आकाश जमिनीवर कोसळला. हे पाहून उपस्थितांमध्ये भीतीचे वातावरण निर्माण झाले. नातेवाईकांनी त्याला शुद्धीवर आणण्याचा प्रयत्न केला, मात्र तो शुद्धीवर आला नाही. यानंतर जवळच्या रुग्णालयात धाव घेतली, मात्र त्याला वाचवता आले नाही. याआधी देखील अशा घटना घडल्या आहेत. एका हिंदी वेबसाईटने याबाबतचे वृत्त दिले आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"