डाव्या कालव्यात  बुडून युवकाचा मृत्यू

मखमलाबाद-चांदशी डाव्या कालव्यालगतच्या रस्त्यावरून जात असताना अचानकपणे दुचाकीसह कालव्यात कोसळून युवकाचा बुडून मृत्यू झाल्याची घटना समोर आली आहे.

नाशिक : मखमलाबाद-चांदशी डाव्या कालव्यालगतच्या रस्त्यावरून जात असताना अचानकपणे दुचाकीसह कालव्यात कोसळून युवकाचा बुडून मृत्यू झाल्याची घटना समोर आली आहे. याबाबत पंचवटी पोलिसांनी दिलेली माहिती अशी, चांदवड तालुक्यातील धोडंबे गावातील रहिवासी असलेला कृष्णा संजय तांदळे (२४) या युवकाचा मृतदेह पाण्यात आढळून आला. कृष्णा हा त्याच्याजवळीलदुचाकीवरून (एमएच १५ डीएफ ५८२३) कालव्याच्या रस्त्याने जात असताना अरुंद रस्त्याचा अंदाज न आल्याने अपघात घडला असावा, असा कयास पोलिसांनी बांधला आहे. त्याच्याजवळील आधारकार्डवरून युवकाची ओळख पोलिसांनी पटविली. दुचाकी पाण्यात तरंगत असल्याचे लक्षात आल्यानंतर परिसरातील शेतकऱ्यांनी पोलिसांना माहिती दिली. तत्काळ मखमलाबाद गावातील पोलीस चौकीवरील कर्मचाºयांनी घटनास्थळी धाव घेत अग्निशामक दलाला माहिती कळविली. पंचवटी उपकेंद्राचा बंब घटनास्थळी दाखल झाला व जवानांनी कालव्यात उतरून पाण्यामध्ये शोध घेत युवकाचा मृतदेह रात्री साडेदहा वाजेच्या सुमारास बाहेर काढला. या प्रकरणी पंचवटी पोलिसांनी अकस्मात मृत्यूची नोंद केली आहे.