जिल्ह्यात लसीकरणाने ओलांडला १८ लाखांचा टप्पा

नाशिक : शहरातील विविध केंद्रांवर मंगळवारी झालेल्या सुमारे ३० हजार लसीकरणाने जिल्ह्यातील १८ लाखांचा टप्पा ओलांडला आहे. जास्तीत जास्त नागरिकांचे लसीकरण करण्यासाठी प्राप्त लसींचे नियोजन केले जात असल्यामुळे ग्रामीण भागातील लसीकरणाचा टक्का देखील वाढला असल्याचे जिल्हा प्रशासनाकडून कळविण्यात आले आहे.

जास्तीत जास्त नागरिकांचे लसीकरण करण्याच्यादृष्टीने जिल्ह्यात लसीकरणाचे नियोजन करण्यात येत असून पंधरा तालुके आणि दोन महापालिका क्षेत्रात असलेल्या लोकसंख्येनुसार लसींचे वाटप केले जात आहे. जास्तीत जास्त केंद्रांवर लस पोहोचावी त्यादृष्टीने नियोजन करण्याच्या सूचना स्थानिक स्वराज्य संस्थांना देण्यात आल्या असून त्यानुसार शहर आणि ग्रामीण भागातील लसीकरण सुरू आहे.

मंगळवारी झालेल्या ३०,९३६ लसीकरणामुळे जिल्ह्यातील एकूण लसीकरणाचा आकडा १८ लाख १३ हजार ४०२ इतका पोहोचला आहे. यामध्ये पहिला डोस घेणाऱ्यांची संख्या १३ लाख ६३ हजार ४१८ इतकी आहे तर दुसरा डोस घेणाऱ्यांची संख्या ४ लाख ४९ हजार ९८४ इतकी आहे. जिल्ह्यात कोविशिल्डचा पहिला डोस घेणाऱ्यांची संख्या अधिक असल्याने कोविशिल्ड लस घेतलेल्यांची संख्या अधिक आहे. पहिल्या डोसनंतर ८४ दिवसांनंतर दुसरा डोस दिला जातो. परंतु या कालावधीत लस उपलब्ध होत नसल्याने अनेकांना विलंब देखील होत आहे. त्यामुळे शक्यतो दुसरा डोस पूर्ण करण्याला प्राधान्य देण्यात येत असल्याने दुसऱ्या डोसची संख्या देखील वाढत आहे.

शहरी भागातील नागरिकांमध्ये लसीबाबत जनजागृती झाली असल्याने शहरातील लसीकरणाची आकडेवारी मोठी आहे. मात्र, आता ग्रामीण भागात देखील लसीकरणाला वेग आला आहे. गेल्या २० ते २५ जुलै या कालावधीत ग्रामीण भागातील लसीकरण हे शहरीभागापेक्षा अधिक असल्याचे दिसून आले आहे. ग्रामीण भागातील लसीकरणावर देखील लक्ष केंद्रित करण्यात आले आहे.

जिल्ह्यातील लसीकरणाला वेग मिळावा यासाठी जिल्हा प्रशासनाकडून अधिक लक्ष केंद्रित करण्यात आले आहे. जिल्हाधिकारी सूरज मांढर यांच्याकडून याबाबतचा आढावा घेतला जात असून लसीकरणाचे नोडल अधिकारी तथा उपजिल्हाधिकारी गणेश मिसाळ लसीकरण वितरणाचे नियोजन करीत आहेत. जिल्ह्यात लसीकरण केंद्रांची संख्या मोठी असल्याने जास्तीत जास्त केंद्रांना लस देण्याच्यादृष्टीने नियोजन केले जात आहे.

--इन्फो--

जिल्ह्यातील एकूण लसीकरण

१८,१३,४०२

पहिला डोस

१३,६३,४१८

दुसरा डोस

४, ४९,९८४