पंचवटी : वाहतुकीच्या नियमांचे पालन व्हावे या हेतूने पोलीस आयुक्त खुद्द रस्त्यावर उतरून वाहनचालकांचे प्रबोधन करीत असले तरी, शहरातील बेशिस्त रिक्षाचालकांकडून उघडपणे वाहतुकीच्या नियमांची पायमल्ली होत असल्याचे चित्र दिसून येत आहे. नाशिक शहरातील सर्वच मुख्य वाहतुकीच्या रस्त्यावर रिक्षाचालकांकडून क्षमतेपेक्षा जास्त प्रवासी वाहतूक करून, तर काही रिक्षाचालक परराज्यातून देवदर्शनासाठी येणाऱ्या भाविकांकडून अव्वाच्या सव्वा भाडेवसुली करून सर्रासपणे आर्थिक लूटमार करीत असल्याचे दिसून येत आहे. क्षमतेपेक्षा जास्त प्रवाशांची वाहतूक करणाºया रिक्षाचालकांवर वाहतूक शाखेकडून कारवाई केली जात असली तरी ही कारवाई नियमितपणे होत नसल्याने रिक्षाचालकांची मुजोरी वाढत चालली असल्याची तक्र ार नागरिकांनी केली आहे. शहरातील रविवार कारंजा, नवीन आडगाव नाका, दिंडोरीरोड, पेठरोड यांसह अन्य वाहतूक मार्गांवर रिक्षाचालक चालकाच्या आसनाशेजारी दोन व मागील सीटवर पाच ते सहा प्रवासी कोंबून वाहतूक करीत असल्याचे चित्र दिसून येते. दुचाकीवरून जाणाºया वाहनचालकांकडे हेल्मेट नाही, कागदपत्रे नाहीत तसेच अन्य कारणावरून सर्वसामान्य वाहनधारकांना वेठीस धरणारे वाहतूक शाखेचे कर्मचारी बेशिस्त व नियमांची पायमल्ली करणाºया रिक्षाचालकांकडे दुर्लक्ष करीत असल्याचा आरोप सर्वसामान्य नागरिकांनी केला आहे.
वाहतूक नियमांची पायमल्ली
By लोकमत न्यूज नेटवर्क | Updated: April 23, 2018 00:19 IST