सिन्नर : नाशिकहून कोल्हापूरकडे निघालेली खासगी प्रवासी बस मोहदरी घाटात तांत्रिक बिघाडामुळे पेटल्याची घटना रात्री दहा वाजेच्या सुमारास घडली. चालकाने प्रसंगावधान राखत बस उभी करून प्रवाशांना बसमधून उतरविल्याने मोठी जीवितहानी टळली. तथापि, बस पूर्णपणे जळून खाक झाल्याने मोठे नुकसान झाले.
एमआयडीसी व सिन्नर नगरपरिषद अग्निशमन बंबांनी घटनास्थळी पोहोचून आग विझविली.
श्रीहरी दत्तात्रय कुलकर्णी (रा. म्हसरुळ, नाशिक) हे खासगी लक्झरी बस (क्र. एमएच ०९ पी.बी. ३०५९) नाशिकहून कोल्हापूरकडे भाविकांना घेऊन जात होते. बसमध्ये अंदाजे ३० ते ३५ प्रवासी होते. नाशिकहून निघालेली बस रात्री पावणेदहा वाजेच्या सुमारास मोहदरी घाटात आली असता, बसला आग लागल्याचे चालक कुलकर्णी यांच्या लक्षात आले. त्यांनी प्रसंगावधान राखत तत्काळ बस रस्त्याच्या कडेला उभी करून प्रवाशांना बसमधून उतरण्यास सांगितले.
प्रवासी बसमधून सुखरूप बाहेर आल्यानंतर कुलकर्णी यांनी सिन्नर नगरपरिषद व एमआयडीसीच्या अग्निशामक दलाला तसेच एमआयडीसी पोलिसांना माहिती दिल्यानंतर दोन्ही अग्निशामक बंब तत्काळ घटनास्थळी पोहोचले व काही वेळात आग विझविण्यात आली. चालक कुलकर्णी यांनी प्रसंगावधान दाखविल्याने बसमधील सर्व प्रवासी सुखरूप बचावले. याप्रकरणी एमआयडीसी पोलिसात रात्री उशिरापर्यंत घटनेची नोंद करण्याचे काम सुरू होते.
दरम्यान, उन्हाची तीव्रता वाढल्याने दुचाकी किंवा चारचाकी गाड्यांना आगी लागण्याच्या घटना तालुक्यात घडत आहेत. गेल्या महिन्यात पांढुर्ली घाटात धावत्या चारचाकीला आग लागून चालकाचा मृत्यू झाला होता. दुसऱ्याच दिवशी नांदूरशिंगोटे रस्त्यावर चारचाकीने पेट घेऊन आगीत भस्मसात झाली होती. एप्रिल महिन्याच्या शेवटी मोहदरी घाटात कार पेटण्याची तसेच सोमवारी गुरेवाडी शिवारात दुचाकीने पेट घेतल्याने देशवंडी येथील तरुणाचा मृत्यू झाला तर शुक्रवारी रात्री खासगी लक्झरी बस पेटली. मात्र, चालकाच्या प्रसंगावधनाने प्रवाशांचा जीव वाचला.
इन्फो
वाहतूक कोंडी
नाशिक-पुणे महामार्गावर मोहदरी घाटात पावणेदहा वाजेच्या सुमारास खासगी बस पेटल्यानंतर रस्त्याच्या दुतर्फा वाहतुकीची मोठी कोंडी झाली होती. घटनेची माहिती एमआयडीसी पोलिसांना मिळताच पोलीस हवालदार प्रकाश उंबरकर, मिलिंद शिरसाट, चालक खिळे यांच्यासह कर्मचाऱ्यांनी मोदरी घाटात धाव घेऊन रात्री उशिरापर्यंत वाहतूक कोंडी दूर करण्यासाठी मदत कार्य केले. रात्री अकरा वाजेच्या सुमारास वाहतूक कोंडी दूर झाली होती.