नाशिक : धनगर समाजाची अनुसूचित जमातीतील आरक्षणाची मागणी असली तरी ज्या ओबीसी प्रवर्गातून धनगर समाजाला व्हीजेएनटीचे आरक्षण मिळले तेच आरक्षण जाण्याच्या मार्गावर आहे. त्यामुळे सर्व घटकांनी मिळून ओबीसीतील आरक्षण वाचविण्यासाठी संघटित लढा देण्याची गरज असून, त्यासाठी सर्व घटकांनी एकत्रित येण्याचे आवाहन पालकमंत्री छगन भुजबळ यांनी केले.
महाकवी कालिदास कलामंदिर येथे पुण्यश्लोक फाउंडेशनतर्फे आयोजित हिंदुस्थानचा युगपुरुष श्रीमंत सुभेदार मल्हारराव होळकर जन्मोत्सव २०२२ चे औचित्य साधत सार्वजनिक बांधकाम राज्यमंत्री दत्तात्रय भरणे यांचा नागरी सत्कार पालकमंत्री छगन भुजबळ यांच्या हस्ते करण्यात आला. यावेळी ते बोलत होते. व्यासपीठावर प्रहार जनशक्ती पक्षाचे प्रदेशाध्यक्ष अनिल गावंडे, माजी आमदार हरीभाऊ भदे, संयोजन समितीचे धनंजय तानले, सहसंयोजक शिवाजीराव ढेपले, दत्तू बोडके, आदी उपस्थित होते. परंपरा रूढींच्या बंधने झुगारून सुभेदार मल्हारराव होळकर यांनी अहिल्याबाई होळकर यांना सती जाण्यापासून रोखत राज्यकारभार त्यांच्याकडे सोपविला. त्यामुळे आज देशभरात अहिल्याबाई होळकर यांचे नाव पोहोचले असल्याचे नमूद करतानाच समाजातील महिलांनी त्यांचा आदर्श घेऊन आपली प्रगती साधण्याचे आवाहनही भुजबळ यांनी केले. समाजासाठी वेगवेगळ्या कामांना नियमांच्या चौकटी बसवून पुढे नेण्याची वेळ येत असली समाजहितासाठी तेही करण्याचे आश्वासन राज्यमंत्री दत्तात्रय भरणे सत्काराला उत्तर देताना दिले. तर धनगर समाजाचा पारंपरिक व्यवसाय असलेल्या मेंढीपालन व्यवसाय शासनस्तरावर आर्थिक सहाय उपलब्ध करून देण्यासबोतच मेंढ्यांचा विमा, मेंढपाळांना संरक्षण कायदा अस्तित्वात आणण्यासह मेंढीपालन व्यवसायासाठी ठोस योजना आणण्याची मागणी माजी आमदार हरिभाऊ भदे यांनी केली. दरम्यान, महावितरण नाशिकचे अधीक्षक अभियंता ज्ञानेश्वर पडळकर, महापारेशनचे मुख्य कार्यकारी अभियंता विनोद ढोरे व पत्रकार संतोष बिरे यांचा विशेष सन्मान करण्यात आला.
--
हिंदुस्थानचा युगपुरुष श्रीमंत सुभेदार मल्हारराव होळकर पुरस्कारार्थी
मुंबईचे विभागीय सहनिबंधक बाजीराव शिंदे, ह.भ.प. तुकाराम महाराज जेउरकर, माजी उपजिल्हाधिकारी तथा साहित्यिक देविदास चौधरी, नगरसेवक पूनम मोगरे, नाशिक जिल्हा अहिल्यादेवी शिक्षण प्रसारक मंडळाचे सचिव महेंद्र दुकळे, उद्योजक बाळासाहेब मूरडनर, प्रगतिशील शेतकरी दत्तू देवकर, जनरल सर्जन डॉ. विजय थोरात, पत्रकार धनंजय वानले, क्रीडापटू विजय गाढे.