अभोणा: येथील ग्रामीण रुग्णालय परिसरातील शवविच्छेदन कक्षाबाहेरील झाडाला गळफास लावून एका तरुणाने आत्महत्या केल्याची घटना गुरुवारी (दि. १८) सकाळी ८ वाजेच्या सुमारास उघडकीस आली आहे. घटनेची माहिती मिळताच पोलिसांनी घटनास्थळी धाव घेतली.
पोलीस तपासात सदर तरुण इंशी (ता. कळवण ) येथील पोपट साहेबराव महाले (वय ३७) असल्याचे निष्पन्न झाले.
याबाबत अभोणा पोलिसात आकस्मिक मृत्यूची नोंद करण्यात आली आहे. दरम्यान, सदर घटनेच्या आदल्या रात्री घरगुती वादातून मयत पोपट यास मारहाण झाली होती. याबाबत रात्री उशिरा अभोणा पोलिसात प्राथमिक तक्रार दाखल केल्याचे तसेच मारहाणीमुळे अंगाखांद्यावर जखमा झालेल्या असल्याने त्यास रात्री उशिरा रुग्णालयात पाठविण्यात आल्याची माहीती पुढे येत असून सदर तरुण रुग्णालयात दाखल झाला नसल्याचे रुग्णालय व्यवस्थापनाकडून कळविण्यात आले आहे. याबाबत अधिक तपास साहाय्यक पोलीस निरीक्षक नितीन शिंदे यांच्या मार्गदर्शनाखाली उपनिरीक्षक भोईर करीत आहेत.
.