चौरंगी लढतीचे यशापयश मतविभागणीच्या हाती

चौरंगी लढतीचे यशापयश मतविभागणीच्या हाती

व्यक्तिकेंद्रित राजकारणाची ओळख निर्माण केलेल्या निफाड विधानसभा मतदारसंघात यंदा चार तुल्यबळ पक्षांमध्ये खरी लढत होणार असल्याचे चित्र स्पष्ट झाले आहे. मात्र या चौरंगी लढतीच्या यशापयशाची खरी मदार मतविभागणीवर अवलंबून आहे. नाते-गोते आणि गट-तट तसेच वेगवेगळ्या पक्षांमध्ये राहूनसुद्धा आतून भलत्याच उमेदवाराला रसद पुरविण्याचे तंत्र वापरणे सुरू झाल्याने कोण नेमकी कोणाची मते खेचतो याभोवतीच निकालाचे गणित फिरणार आहे.शिवसेनेकडून आमदार अनिल कदम, राष्ट्रवादीतर्फे माजी आमदार दिलीप बनकर, काँगे्रसकडून राजेंद्र मोगल, भाजपाकडून वैकुंठ पाटील, मनसेकडून सुभाष होळकर, बसपाकडून धर्मेंद्र जाधव, तर अपक्ष म्हणून नईम शब्बीर शेख नशीब आजमावित आहेत. प्रारंभी आजी-माजी आमदारांमध्येच दुरंगी लढत होईल, असे गृहितक मानले जात होते. मात्र युती आणि आघाडीमधला ‘संसार’ दुभंगला आणि प्रचाराचा ज्वर जसाजसा चढू लागला तसे स्वतंत्र लढतीचे चित्र बदलत गेले. आजच्या घडीला प्रमुख पक्षांमध्ये चौरंगी लढत होण्याचे संकेत मिळू लागले आहेत. आतापर्यंत ओझर-सुकेणा-पिंपळगाव पट्ट्याचे एक गठ्ठा मतदान निर्णायक ठरायचे. यंदा मात्र चौरंगी लढतीतील उमेदवार आपापल्या भागातील मते मिळविण्यासोबतच नाते संबंधातील मते खेचणार असल्याने चारही दिशेकडील मते पदरात पाडून घेण्यात कोण यशस्वी होतो, यावर बरेच काही अवलंबून राहणार आहे. विद्यमान आमदार कदम यांनी सेनेचा भक्कम उभारलेला गड, जनसंपर्काच्या बळावर तालुक्यात कार्यकर्त्यांचे विणलेले जाळे या गोष्टी त्यांच्यासाठी पोषक मानल्या जात असल्या तरी गोदाकाठच्या भागातील रस्त्याच्या न सुटलेल्या समस्या तसेच तालुक्यात येवला-सिन्नरच्या धर्तीवर टोलेजंग इमारतींसारखी भरीव कामे न केल्याचा ठपकाही त्यांच्यावर आहेच.राष्ट्रवादीचे दिलीप बनकर यांनी गेल्या पाच वर्षांपासून विरोधक म्हणून बजावलेली भूमिका, पक्षाचे वाढविलेले संघटन, भुजबळांची लाभलेली साथ, तसेच गेल्या निवडणुकीत राष्ट्रवादीत राहून घरभेदी करणाऱ्या नेत्यांना आपलेसे करण्यात मिळविलेले यश या बनकरांच्या दृष्टीने जमेच्या बाजू मानल्या जात आहेत. कॉँग्रेसचे राजेंद्र मोगल यांच्यामागे स्व. माजी आमदार मालोजीराव मोगल यांची पुण्याई, सहानुभूती, निसाकाची थबकलेली चाके नव्याने फिरविण्यासाठी वठविलेली महत्त्वाची भूमिका तसेच विविध पक्षांमध्ये विखुरलेला पूर्वाश्रमीचा मोगल गट या निवडणुकीत मात्र मागे उभा राहिल्याने राजेंद्र मोगल यांच्यासाठी लाभदायी ठरणार आहे. भाजपाचे वैकुंठ पाटील यांना मोदी प्रभावाचा किती लाभ होतो याचा निष्कर्ष आत्ताच काढणे शक्य नसले तरी निफाडच्या पूर्व आणि मध्य भागावर असलेली त्यांची पकड, भाजपाचे माजी तालुकाध्यक्ष सुरेशबाबा पाटील व कॉँग्रेसचे माजी मंत्री विनायकदादा पाटील यांचा पुतण्या, तसेच तालुक्यात मोगल यांच्या पाठोपाठ असलेले मोठे नातेसंबंध याचा लाभ पाटील यांना नक्कीच होणार आहे. मनसेचे सुभाष होळकर नात्याने दिलीप बनकर यांचे चुलत जावई असल्याने, तसेच व्यापारामुळे पिंपळगाव बसवंतमध्ये वाढलेल्या संपर्काच्या बळावर निर्णायक मते मिळविण्यापर्यंत ते मजल गाठतील, असे वाटते. बनकर यांच्या वोट बॅँकेत वाटेकरी होणार असल्याने होळकर व मोगल यांची उमेदवारी बनकर यांच्यासाठी, तर वैकुंठ पाटील यांची उमेदवारी कदम यांच्यासाठी डोकेदुखी ठरू शकेल.निफाड मतदारसंघात यावेळी चारही उमेदवारांमध्ये होणारी मतविभागणी निवडणूक रंगतदार आणि अटीतटीची होण्यासाठी कारणीभूत ठरणार आहे.