सिन्नरला कारच्या धडकेत युवक ठार

सिन्नर : नाशिक-पुणे महामार्गावर येथील हॉटेल वैष्णवीसमोर मंगळवारी (दि.२८) रात्री साडेदहा च्या सुमारास बलेनो कार व मोटारसायकल यांच्यात भीषण अपघात झाला. त्यात मोटारसायकल स्वार ठार झाला तर एक जण जखमी झाला. दीपक मुरलीधर अहिरे (३४, रा. न्यू गौतम नगर, सिन्नर) यांचा उपचारादरम्यान मृत्यू झाला. तर गंभीर जखमी सागर सुधाकर दिवे (२८, रा. सिन्नर) याच्यावर नाशिकच्या खासगी दवाखान्यात उपचार सुरु आहेत. याबाबत मिळालेली माहिती अशी यथील सिन्नर केबल नेटवर्कचे कर्मचारी तथा एससीएन वृत्तवाहिनीचे तंत्रनिर्देशक दीपक अहिरे व सागर दिवे मोटारसायकलने (एम.एच.१५, एफ.बी.४७४२) माळेगाव एमआयडीसीत जात होते. त्याचवेळी नाशिककडून सिन्नरच्या दिशेने भरधाव येणाऱ्या बलेनो कारने (एम. एच. १२, क्यु. जी.४७४२) हॉटेल वैष्णवी समोर मोटारसायकलला जोरदार धडक दिल्याचे समजते. त्यात दीपक व सागर दोघे गंभीर जखमी झाले. त्यांना तत्काळ येथील खासगी दवाखान्यात उपचारांसाठी दाखल करण्यात आले. तथापि, प्रकृती चिंताजनक असल्याने नाशिकला हलविण्यात आले. अपघातानंतर बलेनोचालक कार सोडून फरार झाला. नाशिक येथे उपचारादरम्यान बुधवारी (दि.२९) पहाटे दीपक अहिरे यांची प्राणज्योत मालवली. त्यांच्या पश्चात आई, वडील, भाऊ, भावजई, बहिण, पुतणे, भाचे असा परिवार आहे.