नाशिक : शहरातील पूर्व विधानसभा मतदारसंघात काही केंद्रांचा अपवाद वगळता सकाळपासून मतदानाचा उत्साह दिसून आला. पावसाने उघडीप दिल्यामुळे ज्येष्ठ नागरिकांनी घराबाहेर पडत मतदानासाठी मतदान केंद्र गाठून मतदान केले. यावेळी पंचवटी भागातील आरपी विद्यालयासह विविध विद्यालयांतील विद्यार्थिनींनी ज्येष्ठ नागरिकांना आणि दिव्यांगांना केंद्राच्या प्रवेशद्वारापासून प्रत्यक्ष मतदान कक्षापर्यंत पोहोचविण्यासाठी आधार देत महत्त्वाची भूमिका पार पाडली.नाशिक शहरात मतदानाचा टक्का वाढविण्यासाठी विविध सामाजिक संघटनांसह स्वयंस्वेवी गट कार्यरत असताना आरपी विद्यालयाच्या विद्यार्थिनींनीही या लोकोत्सवात मोलाचे योगदान दिले. या ठिकाणी असलेल्या मतदान केंद्रावर पंचवटीतील ज्येष्ठ नागरिकांना वाहन तळापासून ते मतदान केंद्र्रापर्यंत जाण्यासाठी या विद्यार्थिनींनी आधार दिला. तर काही विद्यार्थ्यांनी मतदारांना त्यांचे नाव यादीत शोधून देण्यासाठी मदत केली. त्यामुळे मतदारांना तात्काळ आपला हक्क बजावता आला.काही ज्येष्ठ नागरिकांसोबत त्यांचे कुटुंबीय असले तरी त्यांना प्रवेशद्वारापासून मतदान कक्षापर्यंत घेऊन जाण्यासाठी कसरत करावी लागत असताना विद्यार्थिनींची मदत अमूल्य ठरली. तर एकट्या आलेल्या ज्येष्ठ मतदारांना केंद्राच्या प्रवेशद्वारापासून मतदान केंद्र अधिकाऱ्यांपर्यंतची नोंद करण्यापर्यंत विद्यार्थिनींनी आधार दिला. तसेच मतदान झाल्यानंतर पुन्हा ज्येष्ठ नागरिकांना व दिव्यांगांना प्रवेशद्वारापर्यंत आणि वाहनतळापर्यंत सोडण्यासाठी मोलाची मदत केली.
ज्येष्ठ, दिव्यांग मतदारांच्या मदतीला सरसावल्या विद्यार्थिनी
By लोकमत न्यूज नेटवर्क | Updated: October 22, 2019 00:45 IST