नाशिक : दुचाकीवर जाणाऱ्या दोघा युवकांना अडवून रिक्षामध्ये बळजबरी बसवून नेत लूटल्याची घटना शनिवारी (दि़२४) दुपारच्या सुमारास घडली आहे़ शहरात घरफोडी, चोरी, चेनस्नॅचिंग यापाठोपाठ दिवसाढवळ्या लुटीच्या घटना घडू लागल्याने घबराट पसरली आहे़ याबाबत अधिक माहिती अशी की, सद्गुरूनगरमधील प्रथमेश आशय राका (१८) हा दुपारी साडेबारा वाजेच्या सुमाराम मित्रासमवेत सागर स्वीटजवळील अनमोल पुस्तकालयाजवळून जात असताना रिक्षाचालकासह एकाने त्यांची दुचाकी अडवली़ यानंतर या दोघांना दमबाजी करीत रिक्षामध्ये बसवून हनुमानवाडीतील भावबंधन मंगल कार्यालय परिसरात घेऊन गेले़ या ठिकाणी या दोघांना मारहाणीची धमकी देऊन त्यांच्याकडील दोन मोबाइल व रोख रक्कम असा नऊ हजार २०० रुपयांचा ऐवज लुटून नेला़ या प्रकरणी राका यांनी दिलेल्या फिर्यादीवरून सरकारवाडा पोलिसांनी अज्ञात रिक्षाचालकासह त्याच्या साथीदाराविरुद्ध जबरी लुटीचा गुन्हा दाखल केला आहे़ (प्रतिनिधी)
पंधरवड्यात दुसरी घटनामूळचा सटाणा मात्र सद्यस्थितीत राणेनगर येथे राहणारा शुभम दिलीप वाघ (२0) हा युवक रविवारी (दि.११) दुपारी बारा वाजेच्या सुमारास रविवार कारंजा येथे उभा होता. त्यास संशयितांनी रिक्षामध्ये (एमएच १५, झेड ६५६७) बसवून पेठरोडमार्गे फुलेनगर येथे घेऊन गेले. या ठिकाणी मारहाण, दमदाटी करून त्याच्या गळ्यातील सोन्याची साखळी, हातातील चांदीचे ब्रेसलेट, दोन मोबाइल व रोख रक्कम असा ३८ हजार रुपयांचा ऐवज बळजबरीने काढून घेतल्याची घटना घडली होती.