इगतपुरीत १०२ विनामास्क कामगारांवर दंडात्मक कारवाई

 चार दिवसात कोरोनाच्या रुग्णसंख्येत अचानक वाढ झाल्याने प्रशासनाची तारांबळ उडाली आहे. तालुका आरोग्य विभागाने चाचण्या घेण्याचे प्रमाण वाढविल्याने रुग्णात वाढ झाल्याची बाब समोर  आली आहे.  दरम्यान गटविकास अधिकारी, पोलीस प्रशासन व महसूल प्रशासनाने अकस्मात एका कंपनीस  भेट देऊन विनामास्क वावरणाऱ्या १०२  कामगारांवर प्रत्येकी २०० रुपयांची दंडात्मक कारवाई केली. 

ठळक मुद्देवाढत्या रुग्णसंख्येने नागरिकांत चिंता

घोटी :  चार दिवसात कोरोनाच्या रुग्णसंख्येत अचानक वाढ झाल्याने प्रशासनाची तारांबळ उडाली आहे. तालुका आरोग्य विभागाने चाचण्या घेण्याचे प्रमाण वाढविल्याने रुग्णात वाढ झाल्याची बाब समोर  आली आहे.  दरम्यान गटविकास अधिकारी, पोलीस प्रशासन व महसूल प्रशासनाने अकस्मात एका कंपनीस  भेट देऊन विनामास्क वावरणाऱ्या १०२  कामगारांवर प्रत्येकी २०० रुपयांची दंडात्मक कारवाई केली. कोरोनाच्या वाढत्या प्रभावाने सामान्य जनता पुन्हा एकदा त्रस्त झाली असून कोरोना रोखण्यासाठी घालण्यात येणाऱ्या बंधनांमुळे नागरिकांना अनेक अडचणींना सामोरे जावे लागत आहे. त्यात आठवडे बाजार, तसेच शनिवार व रविवार या विकेंडच्या दिवशीही जीवनावश्यक वस्तूंच्या दुकाने वगळता अन्य दुकाने , व्यवहार व आस्थापने बंद राहत असल्याने मजुरी, रोजगार आदींचा प्रश्न निर्माण होत आहे. चार दिवसांपासून तालुक्यात अचानक रुग्णसंख्या वाढल्याचे चित्र समोर आले आहे. तालुक्यातही सर्वच गावात कोरोना प्रादुर्भाव रोखण्यासाठी नियमांच्या अंमलबजावणीसाठी उपाययोजना सुरु झाल्या आहेत. घोटी, इगतपुरी, कांचनगाव, टाकेद आदी ठिकाणी तसेच ग्रामीण भागातही रुग्ण आढळून येत असल्याने दक्षता घेण्याची गरज निर्माण झाली आहे.तालुका आरोग्य प्रशासनाने गेल्या आठवडाभरात जवळपास एक हजार संशयित रुग्णांच्या चाचण्या केल्या. त्यामुळेच रुग्णसंख्या वाढल्याचे समोर आले आहे. सद्यस्थितीत तालुक्यात ८१ कोरोनाबाधित रुग्ण आहेत. त्यातील बहुतांश रुग्ण घरीच उपचार घेत असून काही रुग्णांवर रुग्णालयात उपचार सुरु असल्याची माहिती तालुका वैद्यकीय अधिकारी डॉ. एम. बी. देशमुख यांनी दिली. नागरिकांनी गर्दीत जाणे टाळणे, मास्क वापरणे गरजेचे असल्याचे त्यांनी सांगितले.वीस हजारांचा दंड वसूलगटविकास अधिकारी डॉ. लता गायकवाड, भरत वेंदे, घोटीचे पोलीस निरीक्षक जालिंदर पळे व महसूल विभागाच्या अधिकाऱ्यांनी गुरुवारी (दि.१८) तालुक्यातील जिंदाल कंपनीत जाऊन नियमांच्या अंमलबजावणीची तपासणी केली असता अनेक कामगार विनामास्क वावरत असल्याची धक्कादायक बाब निदर्शनास आली. या बाबीची दखल घेत १०२ कामगारांना प्रत्येकी २०० रुपये प्रमाणे वीस हजार चारशे रुपयांची दंडात्मक कारवाई केल्याची माहिती पळे यांनी दिली.