येवला : पंतप्रधान हा कोणत्या एका पक्षाचा नसतो, ते संपूर्ण देशाचे असतात. त्यांच्याबद्दल कोणीही बोलताना पातळी सोडून बोलणे चुकीचे आहे, असे मत भाजपा नेत्या तथा माजी महिला व बालकल्याणमंत्री पंकजा मुंडे यांनी व्यक्त केले. येवला दौऱ्यावर आलेल्या मुंडे यांनी विधानपरिषदेचे आमदार नरेंद्र दराडे व शिक्षक आमदार किशोर दराडे यांच्या निवासस्थानी सदिच्छा भेट दिली, यावेळी माध्यमांशी बोलताना त्यांनी ही प्रतिक्रिया व्यक्त केली. यावेळी दराडे कुटुंबाच्यावतीने येवल्याची पैठणी देऊन त्यांचा सत्कार करण्यात आला.
पंतप्रधान नरेंद्र मोदी यांच्याबद्दल नाना पटोले यांच्या वादग्रस्त वक्तव्यावर पत्रकारांनी विचारलेल्या प्रश्नावर बोलताना मुंडे यांनी नाव न घेता पटोले यांच्यावर टीका केली. ओबीसी राजकीय आरक्षणासंदर्भात बोलताना, ८ फेब्रुवारीला कोर्टात निर्णय लागेपर्यंत त्याची मी प्रतीक्षा करणार आहे. मात्र पुढील होणाऱ्या निवडणुका या ओबीसी आरक्षणाशिवाय होत असून याची मनाला पिडा आहे. याप्रश्नी सरकार आपले मत कसे मांडते, याच्यावर आम्ही लक्ष ठेवून असून सरकारने प्रभावीपणे भूमिका मांडावी, अशी अपेक्षाही त्यांनी व्यक्त केली. भाजपमध्ये आपण नाराज आहात का, असा प्रश्न पत्रकारांनी विचारला असता, स्मितहास्य करून मुंडे यांनी त्यावर उत्तर देणे टाळले.
याप्रसंगी आमदार दराडे बंधूंसह जिल्हा परिषदेच्या शिक्षण व आरोग्य सभापती सुरेखा दराडे, मीना दराडे, डॉ. कविता दराडे, सिद्धांत दराडे, भाजपा नगरसेवक प्रमोद सस्कर, ओबीसी आघाडीचे अध्यक्ष सुनील काटवे आदी उपस्थित होते.