अझहर शेख, नाशिक : शहरातील पोलिस आयुक्तालयांतर्गत असलेल्या उपनगर पोलिस ठाण्यात नेमणूकीला असलेले पोलिस अंमलदार स्वप्नील गायकवाड (३४,रा.मॉडेल कॉलनी, नाशिकरोड) यांनी स्वत:च्या सहा वर्षीय बालिकेचा गळा आवळून खुन केला. त्यानंतर स्वत:ही गळफास घेत आत्महत्या केल्याची धक्कादायक घटना मंगळवारी (दि.२४) संध्याकाळी घडली.
नाशिक शहरातील पुणे महामार्गावर उपनगर पोलिस ठाणे आहे. या पोलिस ठाण्यात अंमलदार गायकवाड यांची नेमणूक होती. २०१४ साली ते पोलिस दलात दाखल झाले होते. त्यांनी त्यांची चिमुकली भैरवी गायकवाडचा गळा दाबून खुन केला. यानंतर स्वत:ही गळफास घेतला. या घटनेने संपुर्ण शहर पोलिस दलासह परिसरात खळबळ उडाली आहे. गायकवाड दाम्पत्यामध्ये मागील काही दिवसांपासून कौटुंबिक कलह सुरू होता, अशी चर्चा परिसरात आहे.
या कलहातून त्यांचा घटस्फोट झाला होता. गायकवाड यांच्या पश्चात आई, वडील असा परिवार आहे. गायकवाड याने अशाप्रकारे इतके टोकाचे पाऊल का उचलले? याचा तपास आता उपनगर पोलिसांनी सुरू केला आहे. सहावर्षाच्या चिमुकलीला पित्याने ठार मारण्याच्या कृत्याने परिसरात हळहळ अन् संतापही व्यक्त केला जात आहे. याप्रकरणी रात्री उशिरापर्यंत उपनगर पोलिस ठाण्यात गुन्हा दाखल करण्याचे काम सुरू होते.