इंदिरानगर : पांडवनगरी परिसरात शुक्रवारी (दि.६) भर दिवसा पती-पत्नीला चाकूचा धाक दाखवून आठ हजार रुपयांचा ऐवज लंपास केल्याची घटना घडल्याने परीसरात खळबळ उडाली आहे. या प्रकरणी पीडित दाम्पत्याने इंदिरानगर पोलीस ठाण्यात दिलेल्या फिर्यादीवरून पोलिसांनी गुन्हा दाखल केला असून पोलीस लुटारूंचा शोध घेत आहेत. पोलिसांनी दिलेल्या माहितीनुसार, रंजना नितीन आहेर (२६, रा अभिमन्यू अपार्टमेंट समोर, पांडवनगरी) यांनी या प्रकरणी फिर्याद दिली आहे. रंजना आहेर शुक्रवारी (दि. ६) दुपारी साडेबारा वाजेच्या सुमारास घरातील किचनमागील दरवाजातून मोबाईलवर बोलत असताना घरात येत होत्या. त्यावेळी त्यांच्या पाठीमागून एक २५ वर्षीय युवक घरात आला. त्याने रंजना आहेर यांचा उजवा हात पाठीमागे धरून ठेवत पैशांची मागणी केली. तसेच सुमारे एक फुटाचा चाकू दाखवून त्याने पैशासाठी दमबाजी करीत पुन्हा पैशाची मागणी केली. यावेळी रंजना आहेर यांचे पती नितीन आहेर तेथे आले, त्यांनी आरडाओरडा केला. त्यामुळे लुटारूने दोघांनाही चाकूचा धाक दाखवून बेडरूममध्ये बसवले. त्यानंतर घरातील कपाटांमधील कपडे बाहेर फेकून त्यातील दोन हजार रुपयांची रोकड व नितीन आहेर यांचा मोबाईल व एक पाचशे रुपये किंमतीचा मोबाईल असा एकूण ८ हजार रुपयांचा ऐवज लुटून घरामागील भिंतीवरून उडी मारून पळ काढला. या प्रकरणी रंजना आहेर यांनी इंदिरानगर पोलीस ठाण्यात फिर्याद दिली असून पोलिसांंकडून चोरट्याचा शोध घेण्यात येत आहे.
पांडवनगरीत दाम्पत्याला भरदिवसा घरात घुसून लुटले
By लोकमत न्यूज नेटवर्क | Updated: August 7, 2021 01:42 IST