नाशिक : उसनवार घेतलेले साडेबारा लाख रुपये परत करीत नसल्याच्या कारणावरून मध्य प्रदेशातील दोघा संशयितांनी वडाळा - पाथर्डी रस्त्यावरून एकाचे अपहरण करून जबर मारहाण केल्याची घटना घडली आहे़ प्रकरणी संशयित दीपक शांतीलाल जैन व सोनू नैन (रा. पिपल्या बुजुर्ग, ता. महेश्वर, जि. खरगोन, मध्य प्रदेश) यांच्याविरोधात इंदिरानगर पोलीस ठाण्यात अपहरणाचा गुन्हा दाखल करण्यात आला आहे़
इंदिरानगर पोलीस ठाण्यात रमेशसिंह डोंगरसिंह सोलंकी (३८, रा. शिवकृपा रो-बंगलो, फ्लॅट नं. १०७, समर्थनगर, पाथर्डीरोड, नाशिक) यांनी दिलेल्या फिर्यादीनुसार काही महिन्यांपूर्वी संशयितांकडून लाखो रुपयांची रक्कम घेतली होती़ यापैकी काही रक्कम सोलंकी यांनी परत केली असली तरी १२ लाख ६० हजार रुपये देणे बाकी होते़
सहारा कंपनीत कामास असलेले सोलंकी यांची कंपनी बंद झाल्याने तसेच कंपनीचे संचालक सुब्रतो रॉय यांना अटक झाल्याने त्यांचे आर्थिक व्यवहार ठप्प झाले़ संशयित जैन यांनी उर्वरित रक्कम घेण्यासाठी गुरुवारी (दि़१०) रात्री साडेनऊ वाजेच्या सुमारास सोलंकी यांना वडाळा-पाथर्डी रोडवरील मेट्रो झोन मंदिरासमोर असलेल्या रामेश्वर मंदिर परिसरात बोलावून घेतले़
यानंतर संशयितांनी सोलंकी यांना शिवीगाळ व मारहाण करून बळजबरीने आपल्या कारमध्ये एमपी ०९ (पूर्ण नंबर माहीत नाही) बसवून अपहरण करून डांबून ठेवले. या दोघांच्या ताब्यातून सुटका झाल्यानंतर सोलंकी यांनी इंदिरानगर पोलीस ठाण्यात धाव घेत या संशयितांविरोधात फिर्याद दिली़