बहरिन, मॉरिशस देशांपेक्षाही नाशिकचे लसीकरण अधिक

नाशिक : वीस लाखांच्या आत लोकसंख्या असलेल्या देशांना मागे टाकत नाशिक जिल्ह्याने २५ लाखांचा टप्पा पूर्ण केला आहे. बहरिन या देशाची लोकसंख्या १६ लाख, तर मॉरिशसची लोकसंख्या अवघी १२ लाख इतकी आहे. त्या तुलनेत नाशिक जिल्ह्याने कितीतरी पटीने अधिक लसीकरण पूर्ण केले आहे. त्यामुळे कमी लोकसंख्येच्या पाच देशांपेक्षा एकट्या नाशिक जिल्ह्याचे लसीकरण २५ लाखांवर पोहोचले आहे. सोमवारी एकाच दिवशी ५६ हजार नागरिकांचे लसीकरण पूर्ण करून विक्रमही करण्यात आला आहे.

नाशिक जिल्ह्यातील लसीकरणाचे उद्दिष्ट पूर्ण करण्यासाठी जिल्हा प्रशासनाकडून नियोजन करण्यात आलेे आहे. केंद्राकडून प्राप्त होणाऱ्या लसींचे वितरण करताना ग्रामीण आणि शहरी भागाचा समतोल राखण्यासाठी वाटपाचे सूत्र ठरविण्यात आले आहे. त्यानुसार महापालिका क्षेत्र तसेच ग्रामीण भागातील नागरिकांच्या लोकसंख्येनुसार लसींचे पहिले आणि दुसरे डोस आरोग्य विभागाला वितरित केले जात आहेत.

स्थानिक स्वराज्य संस्था आणि आरोग्य विभागाच्या माध्यमातून करण्यात आलेल्या नियोजनानुसार नाशिक जिल्ह्याने लसीकरणात आगेकूच सुरूच ठेवली असल्याचे दिसते. जिल्ह्याने आतापर्यंत २५ लाख ६ हजार ६३३ नागरिकांचे लसीकरण पूर्ण केले आहे. नाशिकमधील लसीकरण हे बहरिन, माॅरिशस या देशांनाही मागे टाकणारे आहे. फिजी, भुतान आणि मालदीव या देशांमधील लोकसंख्येपेक्षा नाशिकचे लसीकरण हे अधिक करण्यात आलेले आहे. मंगळवारपर्यंत जिल्ह्याने २५ लाख सहा हजार ६३३ नागरिकांच्या लसीकरणाचा टप्पा पूर्ण केला.

--इन्फो--

१ लाख २२ हजार डोस प्राप्त

दोन दिवसांपूर्वीच लसींचे ९२ हजार डोस प्राप्त झाल्यानंतर जिल्ह्यासाठी पुन्हा एकदा लसींचा मोठा साठा उपलब्ध झाला आहे. मंगळवारी (दि. ३१) जिल्ह्याला एक लाख २२ हजार ६८० लसीचे डोस प्राप्त झाले. एका दिवसात जिल्ह्याला सर्वाधिक लस प्राप्त होण्याची ही पहिलीच वेळ ठरली आहे. रविवार, २९ ऑगस्ट रोजी लसीचे ९३ हजार डोस प्राप्त झाले होते. १३ ते १५ ऑगस्ट असे सलग तीन दिवस डोस प्राप्त झाल्याने लसीकरणाची गती वाढण्यास मदत झाली होती.