नाशिक : पोटाचा भाग पूर्णत: कुजलेला आणि तोंडाचा काही भाग, चारही पाय शिल्लक असलेल्या अवस्थेत बिबट्याचा मृतदेह आढळला आहे. विल्होळी परिसरातील एका शेतात हा मृतदेह आढळल्याने खळबळ उडाली आहे. चार वर्षीय मादी बिबट्याचा हा मृतदेह असल्याचे वन अधिकाऱ्यांनी स्पष्ट केले आहे. त्याचे शवविच्छेदन झाले असले, तरी मृत्यूचे कारण अद्याप स्पष्ट झालेे नाही.
बुधवारी पहाटे विल्होळी शिवारातील महादू जाधव यांच्या मालकी क्षेत्रात बिबट्याचा मृतदेह असल्याची माहिती वन पथकाला मिळाली. घटनास्थळी वनपरिक्षेत्र अधिकाऱ्यांसह वनरक्षक पोहोचले. पण, बिबट्याचा मृतदेह पूर्णत: कुजलेल्या अवस्थेत दिसला. पशुवैद्यकीय अधिकाऱ्यांनी घटनास्थळीच शवविच्छेदन केले. त्यावेळी उपासमारीमुळे किंवा वर्चस्वाच्या लढाईत बिबट्याचा मृत्यू झाल्याचा प्राथमिक अंदाज वर्तविण्यात आला. मात्र, नेमका मृत्यू कशामुळे झाला की शिकारीचा प्रयत्न झाला, याबाबत स्पष्टता झालेली नाही. गंगापूर रोपवाटिकेत या बिबट्यावर बुधवारी सकाळी अंत्यसंस्कार केल्याची माहिती वनपरिक्षेत्र अधिकारी विवेक भदाणे यांनी दिली.