विजयादशमीनिमित्त लासलगावी संघाचे संचलन

लासलगाव : विजयादशमी उत्सवानिमित्त येथे राष्ट्रीय स्वयंसेवक संघाने शहरात पथसंचलन व शस्त्रपूजन कार्यक्र माचे आयोजन केले होते. या प्रसंगी राष्ट्रीय स्वयंसेवक संघाच्या गणवेशातील १०६ स्वयंसेवकानी सकाळी नऊ वाजता रेल्वे स्टेशन येथील हनुमान मंदिरात एकत्रित येऊन शहरातून सघोष पथसंचलन केले. या पथसंचलनात सर्व वयोगटातील स्वयंसेवक सहभागी झाले होते. पथसंचलनानंतर प्रमुख पाहुणे दौलत विठोबा गायकवाड तसेच प्रमुख वक्ते योगेश महाराज आव्हाड, जिल्हा कार्यवाहक कृष्णाजी घरोटे यांच्या उपस्थितीत भगरी बाबा मंदिर येथे शस्त्र पूजन उत्सव साजरा करण्यात आला. या प्रसंगी कार्यक्र माचे प्रमुख पाहुणे गायकवाड गुरु जी म्हणाले, आज संघ व संघाची शिकवण ही काळाची गरज आहे. संघासारखे शिस्तबद्ध संघटन जगात नाही. समाजातील अबाल वृद्धांनी संघात सामील होण्याचे आवाहन त्यांनी या वेळी केले.तसेच प्रमुख वक्ते योगेश आव्हाड यांनी संघाचे आयाम, सेवा शिक्षण क्षेत्र आणि देशाची सुरक्षा याबद्दल माहिती दिली.