शोकाकुल वातावरणात अहेर यांच्यावर अंत्यसंस्कार

शोकाकुल वातावरणात अहेर यांच्यावर अंत्यसंस्कार

देवळा : तालुक्याचे भूमिपुत्र व स्वतंत्र देवळा तालुक्याचे निर्माते माजी आरोग्यमंत्री डॉ. दौलतराव सोनूजी अहेर यांच्यावर सायंकाळी त्यांच्याच नावाने वसलेल्या दौलतनगर येथील मैदानावर शोकाकुल वातावरणात व शासकीय इतमामात अंत्यसंस्कार करण्यात आले. मावळत्या सूर्याला साक्षी ठेवून ‘अमर रहे, अमर रहे डॉक्टर बाबा अमर रहे’ अशा घोषणा देत हजारोंच्या साश्रूनयनांनी आपल्या लाडक्या नेत्याला अखेरचा निरोप दिला.सायंकाळी पाच वाजता शववाहिकेद्वारे देवळा येथे डॉ. अहेर यांचे पार्थिव त्यांच्या मूळ निवासस्थानी आणण्यात आले, त्यावेळी जमलेल्या नातेवाईक, हितचिंतकांचा संयमाचा बांध सुटला. प्रत्येकाने आपल्या भावनांना वाट करून दिली. विधानसभेचे अध्यक्ष हरिभाऊ बागडे, महसूलमंत्री एकनाथ खडसे, पालकमंत्री गिरीश महाजन व सहकार राज्यमंत्री दादा भुसे यांनी त्यांचे अंत्यदर्शन घेऊन पुष्पचक्र अर्पण केले. त्यानंतर अंत्ययात्रा काढण्यात येऊन दौलतनगरमधील डॉ. अहेर यांच्या ‘गिरिजा’ बंगल्यासमोरील मैदानावर अंत्यसंस्कार करण्यात आले. यावेळी पोलीस यंत्रणेकडून गोळीबाराच्या तीन फैरी झाडून मानवंदना देण्यात आली. तत्पूर्वी दुपारी तीन वाजेपासूनच मालेगाव-देवळा रोडवर रस्त्याच्या दुतर्फा हजारो नागरिकांनी गर्दी केली होती. डॉ. अहेर यांच्या निधनाचे वृत्त सकाळी देवळ्यात कळताच नागरिकांनी उत्स्फूर्तपणे संपूर्ण व्यवहार बंद ठेवले. संपूर्ण गावात दिवसभर शुकशुकाट होता. अंत्यसंस्कारप्रसंगी आमदार स्नेहलता काळे, आमदार बाळासाहेब सानप, आमदार अनिल कदम, आमदार सीमा हिरे, आमदार सुधीर तांबे, आमदार पंकज भुजबळ, जिल्हा बॅँकेचे अध्यक्ष नरेंद्र दराडे, माजी खासदार प्रतापदादा सोनवणे, प्रताप वाघ, माजी आमदार शिरीष कोतवाल, शांताराम अहेर, डॉ. शोभा बच्छाव, संजय चव्हाण, श्रीमती नीलिमा पवार, लक्ष्मण सावजी, विजय साने, सतीश कुलकर्णी, डॉ. हेमलता पाटील, श्रीराम शेटे, डॉ. शशीकांत पवार, रवींद्र पगार, रंजन ठाकरे, बाळू पाटील, कारभारी अहेर, आत्माराम कुंभार्डे, डी. जी. सूर्यवंशी, नाना महाले, दत्ता पाटील, प्रकाश वडजे, नितीन पवार, रामचंद्र बापू पाटील, अरुण अहेर, बाळकृष्ण मगर, डॉ. चंद्रशेखर नामपूरकर, विभागीय आयुक्त एकनाथ डवले, जिल्हाधिकारी दीपेंद्रसिंह कुशवाह, जिल्हा परिषदेचे मुख्य कार्यकारी अधिकारी मिलिंद शंभरकर, पोलीस अधीक्षक संजय मोहिते यांच्यासह राजकीय, सामाजिक, शैक्षणिक, आरोग्य व सहकार क्षेत्रातील मान्यवर उपस्थित होते.