जबरी चोरी करणाऱ्या फरार आरोपीस बेड्या

पिंपळगाव बसवंत : त्र्यंबकेश्वर परिसरात केले होते गुन्हे

ठळक मुद्देआरोपी अरुण मुर्तडक यांच्यावर त्र्यंबकेश्वर पोलीस ठाण्यात गुन्हा दाखल

पिंपळगाव बसवंत : त्र्यंबकेश्वर परिसरात जबरी चोरी करुन गेल्या कित्येक महिन्यांपासून पोलीसांना गुंगारा देणारा संशयित आरोपी अरुण मुर्तडक याच्या पिंपळगाव बसवंत पोलिसांनी अखेर मुसक्या आवळत जेरबंद केले आहे.पोलिस सूत्रांनी दिलेल्या माहितीनुसार, जिल्ह्यातील त्र्यंबकेश्वर परिसरात जबरी चोरी करून फरार असलेला संशयित आरोपी अरुण मुर्तडक यांच्यावर त्र्यंबकेश्वर पोलीस ठाण्यात गुन्हा दाखल होता. मात्र गेल्या कित्येक महिन्यापासून मुर्तडक फरार होता. त्याच्या तपासकामी जिल्ह्यातील सर्व पोलीस ठाण्यांना याबत माहिती पुरविण्यात आली होती. याच माहितीच्या आधारे पिंपळगाव बसवंत पोलीस ठाण्यातील पोलीस निरीक्षक भाऊसाहेब पटारे यांच्या मार्गदर्शनाखाली पिंपळगाव पोलीस पथकाने सूत्रे फिरवत आरोपीस शहरातील निफाड फाटा परिसरात बेड्या ठोकल्या.पिंपळगाव पोलीस ठाण्याचे पोलीस उपनिरीक्षक युवराज सैंदाने, गोपनीय विभागाचे नितीन जाधव, रवी बारहाते,पोलीस हवालदार मनोज बोराळे, अशोक कदम,अमोल आहेर, संदीप दराडे आदींच्या पथकाने कारवाई करत सदर आरोपीस त्रंबकेश्वर पोलीस ठाण्याचे उपनिरीक्षक नीलकंठ घोटेकर यांच्याकडे सुपूर्द केले. अधिक तपास त्रंबकेश्वर पोलीस ठाण्याचे अधिकारी कर्मचारी करत आहे.