सायखेडा : सलग दुसऱ्या वर्षी शाळा बंद असल्यामुळे शाळेच्या पहिल्या दिवसाची मजा हरवलेली पाहायला मिळाली. दोन वर्षांपासून कोरोनाचे संकट आल्यामुळे शाळा बंद झाल्या, ऑनलाइन शिक्षण आले, मुलांनी वर्षभर शाळेचे आवारदेखील पाहिले नाही, सगळेच वर्ग बंद असल्यामुळे मागील वर्षी पहिलीत दाखल झालेल्या मुलांनी शाळादेखील पाहिलेली नाही. केवळ नाव दाखल झाले. पुस्तके मिळाली. ऑनलाइन शिक्षक दिसले. भाषा, इंग्रजी, गणित यासारखे पुस्तके असलेले विषय थोडेफार समजले; पण शारीरिक शिक्षण, कार्यानुभव, कला या विषयांची ओळखदेखील झाली नसल्याने मुलांचा शारीरिक, मानसिक, भावनिक विकास थांबला असल्याचे पालक बोलत आहेत. शाळेचे तोंड पाहिले नाही, तरी मुले दुसरीत गेली, ग्रामीण भागात आई-वडील शेतीकाम, मजुरीत व्यस्त असतात. त्यामुळे त्यांना कोणताही अभ्यास घेता येत नाही. केवळ वर्गाने मुले पुढे जातील; पण प्रत्यक्ष ज्ञान आणि अनुभती मिळाली नाही. शिक्षक आणि शाळा समजले नाही. त्यामुळे त्यांना पहिलीतच दाखल करावे, अशी मागणी जोर धरत आहे.
जून महिन्यात नवीन शैक्षणिक वर्षाला सुरुवात होते. एक महिन्याची उन्हाळी सुटी संपली की, १५ जून रोजी शाळा सुरू होतात.
शाळेचा पाहिला दिवस म्हटला की, मुलांमध्ये नवीन ऊर्जा निर्माण होत असते. नवीन वर्ग, नवीन शिक्षक, नवीन दप्तर, सर्व काही नवीन आणि नवलाई असते, शिक्षकही मोठ्या उत्सहात नवीन शैक्षणिक वर्षाची सुरुवात करतात, ग्रामीण भागात पहिलीच्या वर्गातील दाखल मुलांना बैलगाडीत बसवून वाजतगाजत शाळेत आणणे, पाहुण्यांच्या हस्ते गुलाब पुष्प, नवीन पुस्तके, नवीन गणवेश वाटप करून मोठ्याव उत्साहात पहिल्या दिवसाची सुरुवात होते.
---------------------
शाळेचा पहिला दिवस म्हटला की, खूप मजा असायची, नवीन वर्ग, नवीन पुस्तके, नवीन गणवेश, सर्व कसे नवनवीन असायचे, दोन वर्षांपासून ही सगळी नवलाई हरवली आहे. केवळ ऑनलाइन शिक्षण घेऊन शालेय जीवन यांत्रिक झाले आहे. शारीरिक शिक्षण, कार्यानुभव, कला या विषयांची प्रत्यक्ष कृतीतून शिकण्याची गरज असते, ते मोबाइलद्वारे शक्य नाही.
-आर्या कमानकर, विद्यार्थिनी, सायखेडा
-------------------
शाळा बंद असली तरी शिक्षण सुरू आहे, शिक्षक ऑनलाइन, ऑफलाइन, गृहभेटी, गल्लीमित्र या विविध संकल्पनांमधून मुलांपर्यंत शैक्षणिक ज्ञान देण्याचा प्रयत्न करत असले तरी विद्यार्थ्यांविना शाळा, हे चित्र पाहवत नाही, नवागतांचे स्वागत करताना जो आनंद राहायचा, तो मिळाला नाही.
-माणिक मुरकुटे, शिक्षक, सायखेडा
---------------------------
माझ्या पाल्याला मागील वर्षी पहिलीत दाखल केले; पण वर्षभर शाळा बंद असल्यामुळे शाळासुद्धा पाहिली नाही. पहिलीत असलेल्या मुलांना ऑनलाइन शिक्षण किती समजणार, शिक्षक जरी शिकवत असले तरी खेळकर मुलांना हसतखेळत शिक्षण मिळाले नसल्याने त्यांचा मानसिक, भावनिक विकास झाला नाही. त्यामुळे शासन स्तरावर या मुलांना पुन्हा पहिलीत प्रवेश मिळावा, यासाठी विचार व्हावा.
-संदीप सातपुते, पालक