निवडणुकीतून महिला उमेदवार हद्दपार

निवडणुकीतून महिला उमेदवार हद्दपार

मालेगाव : तालुक्यातील मालेगाव मध्य व बाह्य विधानसभा मतदारसंघातून यंदाच्या निवडणुकीत महिला उमेदवार हद्दपार करण्यात आल्या आहेत. या दोन्ही मतदारसंघात विधानसभेसाठी नामनिर्देशन दाखल केलेल्या ३३ उमेदवारांपैकी एकही महिला नाही. विधानसभा निवडणुकीच्या पार्श्वभूमीवर यंदाच्या निवडणुकीत महिला उमेदवार निवडणुकीच्या रिंगणात नाही. यात विशेष म्हणजे महिलांना राजकारणात पन्नास टक्के आरक्षण द्यावे, यासाठी मोठा आरडाओरड करणाऱ्या पक्षानेही उमेदवारी देताना पुरुषांनाच तिकीट दिले आहे. एकीकडे महिलांच्या स्वातंत्र्याविषयी कळवळा दाखवणारे हे पक्ष निवडणुकीचे तिकीट सोयिस्कररीत्या महिलांना विसरल्याचे चित्र आहे. येथील मालेगाव मध्य विधानसभा मतदारसंघात १८ तर बाह्य मतदारसंघात १५ इच्छुकांनी आपले उमेदवारी अर्ज दाखल केले आहेत. यात पुरुषांचीच मक्तेदारी दिसून येते. मागील विधानसभा निवडणुकीत बाह्य मतदारसंघातून काही महिलांनी उमेदवारी केली होती. यंदाच्या निवडणुकीत बाह्य मतदारसंघात एक लाख ३९ हजार ८१५ तर मध्य मतदारसंघात १ लाख १५ हजार ८०५ महीला अशा एकूण २ लाख ५५ हजार ६२० महिला मतदार असतानाही निवडणुकीत प्रतिनिधित्व करण्यासाठी पुढे येऊ नये हे विशेष. महिलांच्या विकासावर व त्यांच्या कर्तृत्वावर नेहमीच गप्पा मारणाऱ्या एकाही पुरुषाने विधानसभेसाठी महिलेला उमेदवारीसाठी पुढे करू नये हे विशेष.