सुस्थितीतील रस्ते फोडून नव्याने डांबरीकरण

निवडणुकीची लगीनघाई : भ्रष्टाचार होत असल्याची बागुल यांची तक्रार

नाशिक : महापालिका निवडणुकीच्या तोंडावर १९२ कोटी रुपयांचे अंतर्गत रस्ते डांबरीकरण करण्याचा गाजावाजा केला जात असताना शहरात अनेक ठिकाणी चांगले रस्ते फोडून डांबराचे थरावर थर टाकले जात आहेत. त्यामुळे चांगले रस्ते फोडून नवे रस्ते करण्यातून मोठा भ्रष्टाचार होत असल्याचा आरोप कॉँग्रेसने केला आहे. या सर्व प्रकारांची चौकशी करण्याची मागणी कॉँग्रेसचे नेते, माजी नगरसेवक राजेंद्र बागुल यांनी केली आहे. शहरातील रस्त्यांची ओरड होत असताना अंतर्गत रस्त्यांची कामे थांबवून ठेवली जातात आणि निवडणुकीच्या तोंडावर सर्व रस्त्यांच्या कामांची एकत्रित गोळाबेरीज करून शंभर सव्वाशे कोटी रुपयांची कामे निवडणुकीच्या तोंडावर केली जातात. मात्र, हे करताना सध्या चांगले रस्ते फोडून त्यावर डांबराचे थरावर थर रचले जात आहेत. त्यामुळे चांगले रस्ते फोडून महापालिकेचे नुकसान केले जातेच, शिवाय नव्याने डांबर टाकण्यासाठी खर्च केला जातो. सध्या शहराच्या मध्यवर्ती भागातील वावरे लेन, भद्रकाली, येवलेकर लेन आणि भद्रकाली टॅक्सी स्टॅण्ड या भागात रस्त्यांचे कॉँक्रिटीकरण करतानाच असाच प्रकार सुरू आहे. नागरिकांची मागणी नसताना आणि कामांची गरज नसताना ही कामे केली जात आहेत. ज्या रस्त्यांचे आयुर्मान आणखी दहा ते पंधरा वर्षे आहे, असे रस्ते जेसीबीने उखडून त्यावर नवीन रस्ते बांधणीचा घाट घातला जात आहे. नागरिकांकडून कररूपाने गोळा झालेल्या पैशांची ही लूट असून, जनतेच्या पैशातून अशाप्रकारची चुकीची कामे करून त्याचे श्रेय घेण्याचे गंभीर प्रकार सुरू असल्याचे राजेंद्र बागुल यांंनी आयुक्तांना दिलेल्या निवेदनात म्हटले आहे. शहराच्या अन्य भागातही अशाच प्रकारे मोठ्या प्रमाणात कामे सुरू असून, डांबरीकरण केले नसतानाही ते उखडून फेकले जात आहे. निवडणुकीच्या तोंडावर नागरिकांना प्रलोभने दाखवण्यासाठी हा अट्टहास आहे, शिवाय टक्केवारी मिळवण्याचा खटाटोप असल्याची टीका करण्यात येत आहे.