लोहोणेर : देवळा पंचायत समितीच्या सभापतिपदी ज्येष्ठ सदस्य अशोक बोरसे यांची शनिवारी (दि. २०) सर्वानुमते बिनविरोध निवड करण्यात आली. देवळा पंचायत समितीचे मावळते सभापती केदा शिरसाठ यांनी आवर्तनानुसार राजीनामा दिल्याने रिक्त झालेल्या सभापतिपदासाठी पंचायत समिती सदस्यांची निवडणूक निर्णय अधिकारी तथा उपविभागीय अधिकारी भीमराज दराडे यांच्या अध्यक्षतेखाली बैठक बोलाविण्यात आली होती. निर्धारित वेळेत सभापतिपदासाठी ज्येष्ठ सदस्य अशोक बोरसे यांचाच एक अर्ज दाखल झाल्याने त्यांची बिनविरोध निवड झाल्याचे निवडणूक निर्णय अधिकारी यांनी जाहीर केले. बैठकीस मावळते सभापती केदा शिरसाठ, उपसभापती अहिल्याबाई पवार, सदस्य कुसूम अहिरे, तहसीलदार कैलास पवार, गटविकास अधिकारी सी. एल. पवार आदि सदस्य उपस्थित होते. यावेळी नूतन सभापती अशोक बोरसे यांनी छत्रपती शिवाजी महाराज, डॉ. आंबेडकर यांच्या पुतळ्यास पुष्पहार अर्पण केला. निवड जाहीर होताच कार्यकर्त्यांनी पाचकंदील परिसरात फटाक्यांची आतषबाजी करत आनंदोत्सव साजरा केला. यावेळी सावकी विकास सोसायटीचे अध्यक्ष धर्मा शिवले, विठेवाडी विकास सोसायटीचे अध्यक्ष विलास निकम, भास्कर निकम, सुधाकर निकम, सुरेश शिवले, प्रताप पाटील, शेखर बोरसे, बापू बोरसे आदिंसह कार्यकर्ते उपस्थित होते. (वार्ताहर)
देवळा पंचायत समिती सभापतिपदी बोरसे
By admin | Updated: February 20, 2016 22:25 IST