सिन्नर बाजार समितीच्या संचालक मंडळास २१ ऑगस्टपर्यंत मुदतवाढ
By लोकमत न्यूज नेटवर्क | Published: April 22, 2021 04:14 AM2021-04-22T04:14:19+5:302021-04-22T04:14:19+5:30
सिन्नर कृषी उत्पन्न बाजार समिती संचालक मंडळाची मुदत २१ ऑगस्ट २०२० रोजी संपुष्टात आली आहे. मात्र समितीच्या संचालक मंडळास ...
सिन्नर कृषी उत्पन्न बाजार समिती संचालक मंडळाची मुदत २१ ऑगस्ट २०२० रोजी संपुष्टात आली आहे. मात्र समितीच्या संचालक मंडळास महाराष्ट्र कृषी उत्पन्न पणन विकास व विनियमन अधिनियम १९६३ कलम १४ (३) नुसार शासनास प्राप्त अधिकाराचा वापर करून २१ ऑक्टोबर २०२० रोजीच्या आदेशान्वये सहा महिने कालावधीसाठी म्हणजेच २१ फेब्रुवारी २०२१ पर्यंत मुदतवाढ देण्यात आली होती. २२ जानेवारी २०२० रोजीच्या शासन आदेशान्वये राज्यातील ज्या कृषी उत्पन्न बाजार समितीच्या संचालक मंडळाच्या निवडणुका नियत झाल्या आहेत, अशा कृषी उत्पन्न बाजार समित्यांच्या संचालक मंडळाच्या निवडणुका २४ जानेवारी २०२१ पासून पुढील तीन महिन्यांच्या कालावधीसाठी पुढे ढकलण्यात आल्या आहेत. त्यामुळे सिन्नर बाजार समितीच्या विद्यमान संचालक मंडळास पुढील मुदतवाढ मिळण्यासाठी प्रस्ताव पणन संचालनालयास सादर केला होता.
-----------------
कोरोना संसर्गामुळे निर्णय
कोरोनामुळे उद्भवलेल्या गंभीर परिस्थितीचा विचार करता तसेच सध्या विषाणू संसर्ग टाळण्यासाठी राज्यात प्रभावी अंमलबजावणी सुरू आहे. त्यामुळे राज्यातील बाजार क्षेत्रात काम करणाऱ्या कृषी पतसंस्था व बहुउद्देशीय सहकारी संस्थांच्या निवडणुका ३१ ऑगस्ट २०२१ पर्यंत पुढे ढकलण्यात आल्या आहेत. त्यामुळे बाजार समितीच्या संचालक मंडळास २२ फेब्रुवारी २०२१ पासून पुढील सहा महिने म्हणजेच २१ ऑगस्ट २०२१ पर्यंत मुदतवाढ देण्यास शासनाने मान्यता दिली आहे. कोरोनामुळे बाजार समितीच्या संचालक मंडळास लागोपाठ दुसऱ्यांदा मुदतवाढ मिळाली असून त्यामुळे तब्बल सहा वर्षे कामकाज करता येणार आहे.