जात पडताळणी विभागाकडून अडवणूक
नाशिक : कुटुंबातील कोणत्याही एका व्यक्तीची जात पडताळणी झालेली असेल तर त्यास वैधता प्रमाणपत्र दिले जाईल, असे शासनाकडून स्पष्ट करण्यात आलेले असतानाही जात पडताळणी विभागाकडून अडवणूक केली जात असल्याच्या तक्रारी समोर आल्या आहेत. अनेक दुर्मीळ कागदपत्रे पुरावा म्हणून मागितली जात असल्याने पालक आणि विद्यार्थी अडचणीत सापडले आहेत.
जुने नाशिकमधील प्रसूतिगृह बंद अवस्थेत
नाशिक : जुने नाशिमधील मुलतानपुरा येथे बांधण्यात आलेले प्रसूतिगृह अद्यापही सुरू करण्यात आलेले नाही. या ठिकाणी महापालिकेने तीन मजली इमारत उभारली आहे. परंतु अद्यापही ती उपयोगात आणलेली नाही. सदर प्रसूतिगृह रुग्णालय सुरू करण्याबाबत अनेकदा मागणी करण्यात आलेली आहे. मात्र मनपाकडून याबाबतची कार्यवाही करण्यात आलेली नाही.
सिडकोत मोफत आरोग्य तपासणी
नाशिक : विघ्नहर्ता मल्टिस्पेशालिटी हॉस्पिटलच्या वतीने प्रजासत्ताक दिनाचे औचित्य साधून मोफत आरोग्य तपासणी शिबिराचे आयेाजन करण्यात आले आहे. सिडकोतील त्रिमूर्ती चौकात असलेल्या हॉस्पिटलमध्ये शिबिर होणार आहे. मोफत शिबिराचा लाभ घेण्याचे आवाहन आयोजकांनी केले आहे.
गोदाघाटावरील राहुट्या उठल्या
नाशिक : गोदाकाठावरील गौरी पटांगण येथे मजुरांच्या राहुट्या आता उठविण्यात आल्या आहेत. शहरात मोलमजुरी करण्यासाठी आलेले मजूर गोदाकाठी राहुटी टाकून राहतात. दिवसभर काम करून हे मजूर गोदाकाठावर परततात. आता येथे काम सुरू असल्याने येथील राहुट्या उठविण्यात आलेल्या आहेत.
शाळा सुरू झाल्याने रस्ते गजबजले
नाशिक : शाळा सुरू झाल्यामुळे रस्ते पुन्हा गजबजले आहेत. सकाळच्या सुमारास रस्त्यावर आता सायकलवर जाणारे विद्यार्थी, तसेच पालकांची वाहने दिसू लागली आहेत. सध्या शालेय वाहतुकीला परवानगी देण्यात आलेली नाही. असे असले तरी सकाळी रस्त्यावरील वर्दळ वाढल्याचे दिसते.