नाशिक : अंबड लिंकरोडवरील सातपूर शिवारात असलेल्या भोर टाऊनशिपजवळ मोकळ्या मैदानात तीन ते चार शाळकरी मुले खेळत होती. जवळच एका गृहप्रकल्पासाठी खोदललेल्या खड्ड्यात मोठ्या प्रमाणात पावासाचे पाणी साचलेले असून, या खड्ड्यात नऊ वर्षीय मुलगा पाय घसरून बुधवारी (दि.२) दुपारी पडला. यावेळी प्रसंगावधान दाखवत आझाद शेख या युवकाने खड्ड्यात उडी घेत बुडणाऱ्या मयूर संजय भोंडवे (रा.जाधव संकुल) या शाळकरी मुलाला बाहेर काढले. त्यास शासकिय जिल्हा रुग्णालयात दाखल करण्यात आले. उपचारादरम्यान आपत्कालीन कक्षात रात्री पावणे अकरा वाजता त्यास मृत घोषित करण्यात आले. दोन दिवसांत ही दुसरी घटना नाशिक शहरात घडली आहे.
विडी कामगार नगरमधील अमृतधाम येथे गृहप्रकल्पाच्या खड्ड्यात साचलेल्या पाण्यात पोहण्यासाठी गेलेल्या तिघा मित्रांचा बुडून मृत्यू झाल्याची घटना सोमवारी सकाळी उघडकीस आली होती. या घटनेची पुनरावृत्ती बुधवारी (दि. २) सातपूर भागात झाली. दुपारी एक वाजेच्या दरम्यान शाळकरी मुले याठिकाणी खेळण्यासाठी आलेली असताना, मयूरचा पाय घसरला अन् तो कुठलेही संरक्षण कुंपण नसलेल्या मोठ्या खड्ड्यात कोसळला. म्हाडा कॉलनी टाऊनशिप जवळील रस्त्याच्या बाजूला असलेल्या मोकळ्या जागेत एका बांधकामासाठी हा खड्डा खोदण्यात आला आहे. जेव्हा आरडाओरड झाली व मयूरसोबत असलेल्या मुलांनी मदतीसाठी आक्रोश केला, तेव्हा जवळच असलेल्या आझाद नामक युवकाने खड्ड्याच्या दिशेने धाव घेतली. अंगावरील शर्ट काढून त्याने तत्काळ खड्ड्यात उडी घेत मयूरला बाहेर काढले. त्याच्या नाकातोंडावाटे पोटात पाणी गेले होते. त्यास जवळच्या खासगी रुग्णालयात दाखल केले. त्यानंतर शासकिय जिल्हा रुग्णालयात त्याची आई सोनी भोंडवे यांनी त्यास उपचारासाठी हलविले. त्याच्यावर अतिदक्षता आपत्कालीन कक्षात उपचार सुरू होते. शासकीय रुग्णालयात अखेरपर्यंत प्रयत्न करण्यात आले मात्र त्याचा उपचाराला प्रतिसाद कमी होत गेला आणि रात्री पावणे अकरा वाजेच्या सुमारास त्याची प्राणज्योत मालवली. याप्रकरणी अंबड पोलीस ठाण्यात अकस्मात नोंद करण्यात आली आहे.