काळाराम मंदिरात आमीर!

काळाराम मंदिरात आमीर!

पंचवटी : येथील श्री काळाराम मंदिरात राजकुमार हिराणी दिग्दर्शित ‘पीके’ या चित्रपटाचे चित्रीकरण करण्यात आले. सिनेअभिनेता आमीर खान याची या चित्रपटात मुख्य भूमिका असून, स्वत: आमीर खान चित्रीकरणासाठी आल्याचे समजताच त्याला बघण्यासाठी शेकडो चाहत्यांनी काळाराम मंदिरात गर्दी केली होती. दरम्यान, आमीर खान चित्रीकरणासाठी आला असला तरी काळाराम मंदिराचे विश्वस्त आणि संस्थान याबाबत अनभिज्ञ होते. देवस्थानच्या वतीने चित्रीकरणासाठी कोणत्याही प्रकारची परवानगी दिली नसल्याचे विश्वस्तांनी स्पष्ट केले. विश्वस्त मंडळाची परवानगी नसतानाही चित्रीकरण सुरू असल्याने काही विश्वस्तांनी तातडीने धाव घेऊन चित्रीकरणासाठी संस्थानने लेखी परवानगी दिली आहे का याची विचारणा करत, परवानगी नसेल तर चित्रीकरण करता येणार नाही असे सांगितल्याने काही काळ गोंधळ झाला होता. अखेर संबंधितांनी चित्रीकरणासाठी श्री काळाराम संस्थानच्या नावे २५ हजार रुपयांची देणगी चित्रीकरणासाठी देण्यात आल्याचे सांगण्यात आल्यानंतर पुन्हा चित्रीकरण सुरू झाले. पोलीस प्रशासनानेदेखील चित्रीकरणासाठी सशुल्क पोलीस बळ दिले होते. ‘पीके’ या चित्रपटात आमीर खान हा मंदिर परिसरात लोटांगण घालत असल्याच्या दृश्याचे चित्रीकरण करण्यात आले. काळाराम मंदिरानंतर श्री नारोशंकर मंदिर परिसरातही चित्रीकरण झाले. तसेच मंगळवारी दिवसभरही चित्रीकरण होणार असल्याचे सांगण्यात आले. चित्रीकरण सुरू असताना भाविकांना मंदिराला प्रदक्षिणा मारण्यास मनाई केल्याने भाविक संतप्त झाले होते. (वार्ताहर)