निंबाळे शिवारात पिकअप पलटी २२ महिला जखमी

चांदवड : तालुक्यातील निंबाळे गावाजवळ मनमाड - लासलगाव रोडवर मजुरांना घेऊन जाणारा पिकअप पलटी झाल्याने त्यात २२ महिला जखमी झाल्या. त्यापैकी चार महिलांची प्रकृती गंभीर असल्याने त्यांना मनमाड येथील शासकीय रुग्णालयात उपचार करून अधिक उपचारासाठी नाशिक येथे पाठविण्यात आले. नांदगाव तालुक्यातील भालूर येथील दररोज ३० महिलांना घेऊन लासलगावजवळील करंजगाव येथे एका शेतात कांदा रोपे लावण्यासाठी पिकअप (क्र. एमएच ०६ एजी २५६९) ही जाते काल या पिकअपचालकाचे निंबाळे गावाजवळ गाडीवरील नियंत्रण सुटल्याने तिने तीन पलटी घेत रस्त्याच्या कडेला असलेल्या मोठ्या खड्ड्यात पलटी झाली. त्यात २२ महिला किरकोळ जखमी झाल्या. परिसरातील नागरिकांनी घटनास्थळी जाऊन मदतकार्य केले. जखमींना मनमाडच्या शासकीय रुग्णालयात दाखल केले. त्यात तीन मुलींचा समावेश असून, जखमीमधील राणी सतीश अहेर (२७), भीमाबाई सुकदेव निकम (५०), लताबाई कांतिलाल मोरे (४०), इंदूबाई बाबूराव बागुल (६०) (सर्व रा. भालूर, ता. नांदगाव) यांना नाशिक येथे अधिक उपाचारासाठी हलविण्यात आले. सुदैवाने या अपघातात जीवितहानी झाली नाही.