कोरोना या जागतिक महामारीने अनेक कुटुंबं उद्‌ध्वस्त झाली आहेत, तर अनेक कुटुंबीयांनी आपल्या प्रमुख कर्ता पुरुष किंवा महिलेला गमावले आहे. अनेकदा कुटुंबातील कर्ता पुरुष किंवा स्त्री गमावल्यानंतर त्या कुटुंबाचे प्रचंड हाल झाले आहेत. तसेच अनेक कुटुंबांवर उपासमारीची वेळ येऊन ठेपत आहे. त्यामुळे शिवसेनेतर्फे वर्धापन दिनानिमित्त शहरातील प्रत्येक कुटुंबातील प्रमुखांचा विमा काढण्यात येणार आहे.
दरम्यान, पुन्हा अशी वेळ कोणावर येऊ नये, आलीच तर त्या परिस्थितीत कोणत्याही कुटुंबाचे हाल होऊ नये, यासाठी सावध होणे गरजेचे असल्याने तळोदा शहर शिवसेनेने शहरातील प्रत्येक कुटुंबप्रमुखाचा पंतप्रधान जीवन ज्योतीचा विमा स्वखर्चाने काढण्याचा उपक्रम हाती घेतला आहे. ज्या व्यक्तीच्या नावाने विमा आहे त्याचा नैसर्गिक किंवा अपघाती मृत्यू झाला तर त्याचा पश्चात कुटुंबाला दोन लाखांपर्यंत किंवा त्यापेक्षा जास्त रक्कम मिळण्याची तरतूद आहे. या रकमेमुळे घरातील कर्त्या व्यक्तीच्या मृत्यूनंतर त्या कुटुंबाची परवड होणार नाही. या रकमेतून कुटुंबातील सदस्याला एक चांगला व्यवसाय सुरू करता येईल व कुटुंबाचा उदरनिर्वाह करता येईल, या हेतूने हा उपक्रम राबविण्यात येत असल्याची माहिती शिवसेनेचे तळोदा शहर प्रमुख जितेंद्र दुबे व आनंद सोनार यांनी दिली आहे.
या उपक्रमाचा शुभारंभ १९ जून रोजी करण्यात येणार असून, त्यानिमित्ताने शहरातील खान्देशी गल्लीत कार्यक्रम आयोजित करण्यात आला आहे. या कार्यक्रमाला शिवसेनेचे ज्येष्ठ नेते, माजी आमदार चंद्रकांत रघुवंशी, शिवसेना जिल्हाप्रमुख विक्रांत मोरे, आमशा पाडवी आदींसह प्रमुख नेते उपस्थित राहणार आहेत. या उपक्रमाचा लाभ घेण्यासाठी आवश्यक कागदपत्रांसह १९ जून रोजी कार्यक्रमस्थळी उपस्थित राहावे व शिवसेनेच्या कार्यकर्त्यांशी संपर्क साधावा, असे आवाहन तळोदा शहर शिवसेनेच्या वतीने करण्यात आले आहे.