घाट सेक्शनमधील बंद झाल्यास पर्यायी मार्गावरील रस्त्याची दुरवस्था

मोलगी परिसर क्षेत्रफळाच्या दृष्टीने मोठे क्षेत्र असून, तालुक्याच्या ठिकाणी येण्यासाठी मोलगी, डाब, अक्कलकुंवा हा मार्ग आहे. मात्र, या मार्गावरील घाट सेक्शन रस्त्याच्या कामासाठी हा रस्ता ३० जूनपर्यंत बंद करणार असल्याचे सांगण्यात येत आहे. या मार्गावरील वाहतूक बंद करण्यात आली, तर मोलगी परिसरातील नागरिकांना अक्कलकुंवा येथे येण्यासाठी साकलीउमर, जुनवाणी, सरी, दहेल, मोगरा, ओघाणी, काटसखाई, वालंबा, होरफडी या मार्गाने अक्कलकुंवा येथे जाण्यासाठी व गुजरात राज्यात जाण्याकरिता हा एकमेव मार्ग आहे. मात्र, या रस्त्याची अवस्था बिकट झाली असून, मार्गातील अनेक ठिकाणी फरशी पूल तुटले असून, रस्त्यावर खड्डे पडून उखडडेला आहे. दहेल मोगरा घाटातील रस्ता दुरुस्तीची मागणी अनेक वर्षांपासून होत आहे. मात्र, संबंधित विभाग दखल घेत नसल्याचे नागरिकांमध्ये नाराजी व्यक्त होत आहे. मार्गावरील वाहनधारकांचे वाहन सुखरूप काढताना हाल होत आहेत. मोलगी, दाब, अक्कलकुंवा मार्ग बंद झाल्यास पर्यायी मार्गावरील रस्ता दुरुस्ती करणे आवश्यक आहे; अन्यथा रस्त्याची दुरवस्था झाल्याने अपघाताचे प्रमाण वाढून नागरिकांपुढे जीविताचा प्रश्न निर्माण होणार असून, प्रशासनाने दखल घेण्याची आवश्यकता आहे.