कोठार : तळोदा शहर व परिसरात कोरोना प्रतिबंधक लसीकरण सप्ताह राबविण्याबाबत नंदुरबार जिल्हा युवक काँग्रेसचे अध्यक्ष जितेंद्र सूर्यवंशी यांनी जिल्हाधिकाऱ्यांकडे मागणी केली होती. त्या अनुषंगाने शहरात सात दिवसांचा सप्ताह राबविण्याबाबत नियोजन करण्याचे आदेश प्रशासनाकडून देण्यात आले आहेत.
जिल्हाभरात कोरोनाचा वाढता प्रादुर्भाव पाहता, यावर कायमस्वरूपी नियंत्रण आणण्यासाठी लसीकरण हाच एकमेव पर्याय सध्यातरी उपलब्ध असल्याने व तळोदा नगर परिषद हद्दीत लसीकरण कार्यक्रमाला नागरिकांचा अत्यल्प प्रतिसाद असल्याने नगर परिषदेमार्फत शहरातील नागरिकांसाठी लसीकरण मोहीम राबविणे गरजेचे होते. या पार्श्वभूमीवर तळाेदा शहरात लसीकरण सप्ताह राबविण्याची मागणी काँग्रेसचे युवक जिल्हाध्यक्ष सूर्यवंशी यांनी जिल्हाधिकारी डाॅ. भारुड यांच्याकडे निवेदनाद्वारे केली होती.
या निवेदनात नागरिकांना सोयीचे ठरणारे स्थळ सुचवून लसीकरणासाठी पथकांना आवश्यक ती मदत करण्याचे आश्वासन देण्यात आले होते. या मागणीची दखल घेत अपर जिल्हाधिकारी यांनी तळोदा पालिकेला पालिका हद्दीत सप्ताह राबविण्याबाबत सूचित केले आहे. त्या अनुषंगाने पालिकेकडून आरोग्य विभागाला पत्रव्यवहार करण्यात आला असून, हा सप्ताह यशस्वीरित्या राबविण्याकरिता आवश्यक तेवढ्या लसी, वैद्यकीय अधिकारी, रुग्णसेवक, सेविका व आरोग्य कर्मचारी देण्याची विनंती करण्यात आली आहे. या उपक्रमांतर्गत २७ एप्रिल रोजी शहरातील जिल्हा परिषद शाळा क्रमांक १, ५ आणि ७ याठिकाणी, २८ रोजी भाईसाहेब गो. हू. महाजन हायस्कूल, २९ रोजी जिल्हा परिषद शाळा क्रमांक २, ३० एप्रिल रोजी संत सावता माळी भवन, ३ मे रोजी शेठ के. डी. हायस्कूल, ४ मे रोजी जैनवाडी तर ५ मे रोजी माळी समाज मंगल कार्यालय याठिकाणी सकाळी १० ते सायंकाळी ५ यावेळेत लसीकरण शिबिर होणार असल्याचे कळविण्यात आले आहे.