बलेसरिया यांनी पोल्ट्री व्यवसायासाठी जर्मन तंत्रज्ञान वापरले होते. एका शेडमध्ये साधारण तीन कोटीची मशीनरी वापरली आहे. त्यासाठी काढलेले कोट्यवधी रुपयांचे कर्ज आता फेडायचे कसे? हा गहन प्रश्न त्यांच्यासमोर उभा राहिला आहे. डोळ्यांदेखत कोट्यवधींचा व्यवसाय नेस्तनाबूत होताना बलेसरिया यांच्या डोळ्यातील अश्रू थांबत नाहीत. हे किलिंग ऑपरेशन थांबणार कधी? मोठ्या इच्छाशक्तीने उभारलेला कोट्यवधींचा पोल्ट्री उद्योग नंतर कसा उभा राहणार? हे व असे अनेक प्रश्न त्यांच्यासमोर आहेत. सध्या तरी उघड्या डोळ्यांनी हृदयावर दगड ठेवून कोंबड्याचे किलिंग ऑपरेशन पाहण्याशिवाय त्यांच्यासमोर दुसरा पर्यायच शिल्लक नाही. पोल्ट्रीतील लाखो कुकुट पक्ष्यांचा कू-कू आवाज शांत झाल्याने पोल्ट्रीत स्मशान शांतता पसरली. पोल्ट्री व्यावसायिक चिंतातूर झाले आहेत.
कोरोनाच्या संकटाबरोबर देशात बर्ड फ्लूचे संकट आले. राज्यातही अनेक ठिकाणी बर्ड फ्लूचा प्रादुर्भाव झाल्याचे सिद्ध झाले आहे. पण याचा सगळ्यात मोठा फटका नंदुरबार जिल्ह्यातील नवापूर तालुक्यात बसला. येथे सध्या देशातील सगळ्यात मोठे किलिंग ऑपरेशन सुरू आहे. साधारण दोन टप्प्यात पोल्ट्रीतील कुकुट पक्षी नष्ट करण्यात आले. पहिल्या टप्प्यात २२ पोल्ट्रीतील साडेपाच लाख कुकुट पक्षी व २५ लाख अंडी नष्ट करण्यात आली. त्यानंतर बर्ड फ्लूची लागण शेजारील गुजरात राज्यातील नॅशनल पोल्ट्रीत झाली. येथे १७ हजार कुकुट पक्षी व ४८ हजार अंडी नष्ट करण्यात आली. येथील बर्ड फ्लूचा अहवाल एच ५एन १ घातक होता. नवापूर शहरातील बर्ड फ्लू एच ५एन ८ सामान्य विषाणू होता. नवापूर शहरातील बर्ड फ्लू २५ किलोमीटर विसरवाडी येथे पोहोचला आहे. तेथील तीन पोल्ट्रीत २० हजार कुकुट पक्षी व लाखो अंडी नष्ट करण्यात आली. त्यानंतर नवापूर शहरातील उर्वरित पाच पोल्ट्रीतील कुकुट पक्ष्यांचे अहवाल तीनवेळा निगेटिव्ह आले. कुठल्या पोल्ट्रीत पक्ष्यांची मरतूक नव्हती. परंतु अचानक मरतूक झाल्याने उर्वरित पाच पोल्ट्रीत बर्ड फ्लू अहवाल पॉझिटिव्ह आल्याने शुक्रवारी चार पोल्ट्रीतील ५१ हजार कुकुट पक्षी नष्ट करण्यात आली. त्यानंतर नवापूर शहरातील सर्वात मोठी शोली पोल्ट्रीचा अहवाल पॉझिटिव्ह आल्याने पोल्ट्री व्यावसायिक चिंतातूर झाले. कारण याठिकाणी साधारण दोन लाख ३७ हजार कुकुट पक्षी व ३० लाख अंडी आहेत. नवापूर तालुक्यातील सर्वाधिक नुकसान शोली पोल्ट्रीत होणार आहे.