प्रथा, परंपरांना फाटा देत बाप्पांना निरोप

लोकमत न्यूज नेटवर्कनंदुरबार : कोरोनाचे विघ्न पळवा आणि पुढच्या वर्षी लवकर या अशी आर्जव करीत गणेश भक्तांनी मंगळवारी बाप्पांना निरोप दिला. कुठलेही वाद्य नाही, मिरवणुका नाही की गुलालाची उधळण नाही अशा साध्या पद्धतीने यंदा बाप्पांना निरोप द्यावा लागला. मानाच्या दादा गणपतीचे सकाळी १०.५० तर बाबा गणपतीचे दुपारी सव्वाबारा वाजता सोनी विहिरीत विसर्जन करण्यात आले. दरम्यान, हरिहर भेटीची परंपरा यंदा खंडित झाली.कोरोनाच्या पार्श्वभुमीवर यंदा गणेशोत्सव साध्या पद्धतीने साजरा करण्यात आला. मंडळांची संख्या देखील यंदा कमी झाली होती. मिरवणुका काढण्यात आल्या नाहीत. शिवाय इतर सर्व पारंपारिक प्रथा, परंपरांना फाटा देण्यात आला. प्रशासनाच्या आवाहनाला सर्वच गणेश मंडळांचा उत्स्फूर्त प्रतिसाद मिळाला.अनंत चतुदर्शीला बाप्पांना निरोप देण्यासाठी मोठ्या प्रमाणावर मिरवणुका निघतात. विविध पारंपारिक पद्धतीने कार्यक्रम होत असतात. यंदा त्यांना फाटा देण्यात आला. मानाच्या गणपतींनी आपल्या पारंपारिक रथाऐवजी ट्रॅक्टर ट्रॉलीवर मूर्ती ठेऊन विसर्जनासाठी नेली. मिरवणुकाच नसल्यामुळे दरवर्षी आकर्षणाचे केंद्रबिंदू राहणाऱ्या हरिहर भेटीलाही फाटा देण्यात आला.याशिवाय इतर सार्वजनिक गणेश मंडळांनी परस्पर मूर्ती विसर्जनासाठी नेल्या. नंदुरबारात तीन ठिकाणी कृत्रीम हौद करण्यात आले होते. त्या ठिकाणी मूर्ती विसर्जनासाठी सायंकाळी उशीरापर्यंत गर्दी होती. पालिकेतर्फे दोन ठिकाणी वाहनांची व्यवस्था कण्यात आली होती. तेथे मूर्ती स्विकारल्या जात होत्या. देखील याशिवाय शहराच्या परिसरात असणारे लहान, मोठे तलाव, बंधारे यांच्यात देखील मूर्ती विसर्जनासाठी गर्दी झाली होती.शहरातून प्रकाशा किंवा इतर ठिकाणी मूर्ती विसर्जनासाठी जाऊ नये याकरीता चारही बाजुंच्या चौफुलींवर पोलीस तैणात करण्यात आले होते. याशिवाय शहरात देखील ठिकठिकाणी पोलिसांचा बंदोबस्त तैणात करण्यात आला होता.