नवापूरच्या भूमिपुत्रांनी केलेल्या प्रयत्नातून दोन रुग्णालयातील रुग्णांना मिळणार श्वास

‘ॲग्रीकाॅस नवापूर’ नवापूर या नावाने तयार करण्यात आलेल्या या ग्रुपच्या माध्यमातून खांडबारा व विसरवाडी ग्रामीण रुग्णालयात ऑक्सिजन पाइपलाइनचा खर्च उचलण्यात आला आहे. कृषी पदवीधरांच्या या सोशल ग्रुपतर्फे खांडबारा व विसरवाडी येथे ऑक्सिजन पाइपलाइनसोबतच सिलिंडर पुरवठा बाबतही कार्यवाही करण्यात येत आहे. यासाठी लागणारा खर्च ग्रुपच्या सदस्यांनी दोन लाख ९५ हजारांचा निधी वर्गणी करून जमा केला होता. ग्रुपचे सदस्य कृषी पदवीधर असून नवापूर तालुक्याचे भूमिपुत्र आहेत. कृषी पदवी प्राप्त करून वेगवेगळ्या खात्यांमध्ये सेवा करीत आहेत. तालुक्यातील गरजू रुग्णांना त्याचा फायदा होईल या उद्देशाने हे काम हाती घेतले आहे. ग्रुपमधील सदस्य, हे पोलीस, महसूल, कृषी,अर्थ व इतर खात्यामध्ये वेगवेगळ्या उच्च पदांवर कार्यरत आहेत. सर्वांनी कुटुंबातील सदस्यांची काळजी घ्यावी, मास्कचा वापर करावा, सामाजिक अंतर राखावे व वेळोवेळी साबणाने हात धुवून कोरोना महामारीपासून बचाव करायचा आहे, असे सर्व समावेशक आवाहन केले आहे. या उपक्रमासाठी पोलीस उपविभागीय अधिकारी विलास पाडवी, चोपडा तहसीलदार अनिल गावीत, जीएसटी उपायुक्त दिलीप गावीत, भारतीय स्टेट बँक अधिकारी रविकांत वळवी, नवापूर तालुका कृषी अधिकारी बापू गावीत, पोलीस निरीक्षक दिलीप वळवी, पोलीस निरीक्षक सतीश गावीत, सुरेश गावीत, अनिल पाडवी, रवी गावीत यांनी मार्गदर्शन केले होते. ग्रुपकडून करून देण्यात आलेल्या निधीतून केलेल्या पाइपलाइनमधून खांडबारा ग्रामीण रुग्णालयात ३० तर विसरवाडी ग्रामीण रुग्णालयात २० बेड हे ऑक्सिजनयुक्त राहणार आहेत. यातून याठिकाणी दाखल होणाऱ्या गंभीर रुग्णांना सहज उपचार देऊन कोरोनावर मात करता येणे शक्य होणार आहे.