डॉक्टर, लसीकरणानंतर किती दिवस मद्यपान करायचे नाही?

लोकमत न्यूज नेटवर्क

तळोदा : शासनाकडून कोरोना प्रतिबंधात्मक लसीच्या तिसऱ्या टप्प्याची सुरुवात करण्यात आली असली तरी मद्य शौकिनांमध्ये कोरोना लसीनंतर मद्य सेवन करावे की नाही याबाबत भीती पसरली आहे. तज्ज्ञ डॉक्टरांच्या मते मद्यसेवनाविषयी सल्ला घेण्यास ही मंडळी सामाजिक धाकाने बिचकतात. तथापि, मद्यसेवनाचे परिणाम माणसाच्या रोगप्रतिकारक शक्तीवर होत असल्याचे तज्ज्ञांचे मत आहे. लसीकरणानंतर दोन आठवडे ते महिनाभर तरी मद्यपान करू नये, असे म्हटले जाते.

कोरोना या जागतिक महामारीवर प्रतिबंधात्मक लस नागरिकांना देण्याची तिसऱ्या टप्प्याची मोहीम केंद्र शासनाकडून गेल्या १ एप्रिलपासून हाती घेतली आहे. जिल्ह्यात आतापावेतो या वयोगटातील २५ हजार नागरिकांनी ही लस घेतल्याचे म्हटले जाते. परंतु या प्रतिबंधात्मक लसीनंतर मद्यसेवन करायचे की नाही, असा प्रश्न शौकिनांमधून उपस्थित केला जात आहे. किती दिवसांनी मद्यपान करायचे याबाबतही शौकिनांना चिंता सतावत आहे.

मद्यात अल्काेहोलचे अधिक प्रमाण असल्यामुळे शरीरातील रोगप्रतिकारक शक्तीवर होतो. लस प्रतिकार शक्ती वाढवते. साहजिकच परिणाम होण्याची शक्यता असते. मद्यामुळे शरीरावर प्रतिगामी परिणाम होऊ शकताे असे तज्ज्ञांचे मत आहे. लसीकरणानंतर एक महिना, १५ दिवस तरी मद्यपान करू नये असे म्हटले जाते. पण याविषयी काय गाईडलाईन्स आहेत त्याबाबत मद्यशौकीन अनभिज्ञ असल्याने ते गोंधळलेले असल्याचे सांगितले जाते. लस घेतल्यानंतर किती दिवसांनी मद्यपान करावे, असा प्रश्न उपस्थित केला जात आहे. त्याचबरोबर काय खाऊ काय खाऊ नये, याबाबतही शंका उपस्थित केली जात आहेत.

मद्यपान हानिकारक

तसे मद्यपान करणे माणसाला हानिकारक आहे. कारण आरोग्याला त्याची क्षती पोहचत असते. तरुण वयात शौक म्हणून सुरू केलेले मद्यपान कालांतराने नियमित व्यसन बनून आपल्या आरोग्याबरोबर संसाराची राखरांगोळी करते. अशी अनेक उदाहरणे घडलेली आहेत. या कोरोना महामारीच्या काळात तरी मद्यपान करणे टाळले पाहिजे, कारण त्याचा वाईट परिणाम शरीरावर पडत असल्याचे तज्ज्ञांचे मत आहे. तथापि, या काळातच मद्याच्या बाटल्याच्या बाटल्या रिचवल्या जात असल्याची चर्चा आहे. मद्यशौकिनांना लॉकडाऊन लागू राहावे अथवा नाही याचे सोयरसुतक नाही.

लसी केंद्रांवर सूचना द्याव्यात

शासनाने कोरोना प्रतिबंधात्मक लस देण्याचे नियोजन उपजिल्हा रुग्णालय अथवा ग्रामीण भागातील आरोग्य केंद्रामार्फत केले आहे. जेव्हा पात्र लाभार्थी अशा केंद्रावर लस टोचून घेतात तेव्हा त्यांना लस घेतल्यानंतर काय खावे, काय खाऊ नये, शिवाय मद्यपान करण्याबाबत काहीच सूचना दिल्या जात नाही. त्यामुळे नागरिकांच्या मनात लसीबाबत शंका उपस्थित केल्या जात आहे. निदान वरिष्ठ आरोग्य प्रशासनाने तरी या प्रकरणी सूचना द्याव्यात, अशी नागरिकांची अपेक्षा आहे.

कोट

लसीनंतर मद्यपान केले तर शरीरामध्ये त्याचे आमूलाग्र बदल होऊन त्याची रिॲक्शन होऊ शकते. श्वसनाचा त्रास, शरीरावर लाल चट्टे येऊ शकतात, शिवाय अचानक शरीराला कंप सुटून बेशुद्ध होऊ शकतात. त्यामुळे मद्यपान टाळणेच उत्तम राहील.

-डॉ. योगेश्वर चौधरी, एम. डी. फिजिशियन, जे. जे. हॉस्पिटल, मुंबई

कोट

कोरोना प्रतिबंधात्मक लस इम्युनिटी वाढविण्यावर परिणाम करते. परंतु मद्यात अल्कोहोलचे प्रमाण अधिक असल्यामुळे इम्युनिटी कमी होते. साहजिकच मद्यपानामुळे लसीकरणावर परिणाम होण्याची शक्यता असल्याने निदान ते महिनाभर तरी टाळले पाहिजे.

-डॉ. गौरव तांबोळी, एम. डी. मेडिसीन, नंदुरबार.