तळोदा - येथील एका व्यावसायिकास सापडलेल्या दागिन्यातून आलेल्या रकमेचे डाळ, तांदूळ, मिरची, तेल आदी वस्तू खरेदी करून धडगाव तालुक्यातील २३ सिकेलसेलग्रस्त कुटुंबांना त्याचे वाटप केले. तलोद्यातील अन्न छत्र परिवाराच्या माध्यमातून ही मदत पोहोचविण्यात आली. कोरोना महामारीमुळे उपासमारीस तोंड देत असलेल्या या कुटुंबांनी समाधान व्यक्त केले आहे.
तळोदा शहरातील योगेश वाणी हे काही दिवसांपूर्वी हनुमान मंदिरात दर्शनासाठी जात होते. रस्त्यात त्यांना दागिना सापडला. ज्याचा असेल त्याला परत देण्यासाठी वाटदेखील पाहिली. मात्र कोणीच आले नाही. शेवटी त्यांनी गावातीलच एका सोनाराकडे त्याची मोड घातली. त्यातून आलेली रक्कम त्यांनी शहरातील अन्न छत्र परिवाराच्या कार्यकर्त्यांकडे स्वाधीन केली. साधारण पाच हजार रुपये त्यातून आले होते. या रकमेतून गरीब कुटुंबांना धान्य स्वरूपात मदत करण्याचे त्यांनी परिवाराच्या कार्यकर्त्यांना सांगितले होते. अन्न छत्र परिवारातील कार्यकर्त्यांनी आपल्या मित्रांच्या माध्यमातून सिकलसेलग्रस्त कुटुंबांचा शोध घेतला. त्यांनी पन्नास कुटुंबांची यादी परिवारास पाठवली. त्यानुसार संतोष माळी, पुतन दुबे या कार्यकर्त्यांनी साधारण पावणेदोन क्विंटल माल एका वाहनाने धडगाव तालुक्यातील या कुटुंबांना रवाना केला. त्यांना तो माल वाटपदेखील करण्यात आल्याचे या कार्यकर्त्यांनी सांगितले. ऐन कोरोना महामारीच्या काळात रोजगारापासून उपेक्षित असलेल्या कुटुंबांना आधार मिळाल्याने त्यांनी समाधान व्यक्त केले आहे.
चौकट....
उर्वरित कुटुंबांनादेखील मदत देणार
तळोदा शहरातील अन्न छत्र परिवारातील हे दोन्ही कार्यकर्ते गेल्या वर्षभरापासून समाजातील गरीब, घटकांसाठी अन्न-धान्याची मदत करीत आहेत. ज्या ठिकाणी लग्न व इतर कार्य असेल तेथून शिल्लक राहिलेले अन्न गरजूंना देत असतात. कोरोना महामारीत तर त्यांनी दानशुरांच्या आर्थिक सहकार्यातून धान्य व वस्तू दिल्या होत्या. आताही त्यांचे कार्य सलग सुरूच आहे. व्यावसायिकाने दिलेल्या रकमेतून त्यांनी २७ सिकेलसेलग्रस्त कुटुंबांना मदत दिली. उर्वरित कुटुंबांनादेखील मदत देणार आहोत, असे कार्यकर्त्यांनी सांगितले.
कोट....
शहरातील एका दुकानदाराने सापडलेल्या दगिन्यातून आलेली रक्कम कोरोना काळात अपेक्षित असलेल्या कुटुंबांना धान्य स्वरूपात मदत देण्याची इच्छा व्यक्त केली होती. त्यामुळे या रकमेतून पावणेदोन क्विंटल माल आला होता. लगेच धडगाव तालुक्यातील गरजू कुटुंबांना रवाना केला. - योगेश वाणी, दुकानदार.