नंदुरबार : कोरोना महामारीसोबत दोन हात करण्यासाठी जिल्ह्यात गेल्या दोन वर्षात आरोग्य विभागात मोठे बदल झाले आहेत. प्रामुख्याने सुविधा वाढवण्यावर भर दिला गेला असून, कधीकाळी एकूण १ हजार बेड असलेल्या जिल्ह्यात एकाचवेळी सहा हजार नागरिक उपचार घेऊ शकतील, अशी सोय झाली आहे.
शासकीय आणि खासगी स्तरावर निर्माण झालेल्या सोयींमुळे जिल्ह्यात दुसरी लाट नियंत्रणात येऊन कोरोनाही नियंत्रणात आहे. दरम्यान, खासगी रुग्णालयांची संख्या ही २३ ने वाढली आहे. शासकीय इमारतींमध्ये व्हेंटिलेटर्ससोबत ऑक्सिजन बेड वाढले आहेत. जिल्ह्यात प्रथमच ऑक्सिजन काॅन्स्ट्रेटरची सुविधा करण्यात आली आहे. हे यंत्र ऑक्सिजनची गरज असलेल्या कोरोना रुग्णांना उपायकारक ठरत असल्याचे सांगण्यात आले आहे. रुग्णांसाठी वाढलेल्या सुविधांचा लाभ येत्या काळात इतर आजारावरच्या रुग्णांनाही होणार असल्याची माहिती देण्यात आली आहे. परिणामी, येत्या काळात आरोग्य यंत्रणा अधिक सक्षम असेल, अशी अपेक्षा असून, या सुविधांची देखभाल नियमित झाल्यास त्या दीर्घकाळ टिकणार आहेत.
नंदुरबार जिल्ह्यात गेल्या दीड वर्षात ऑक्सिजन व व्हेंटिलेटर्सच्या संख्येत मोठी वाढ झाली आहे. जिल्ह्यात आजघडीस ८८० बेड हे थेट उपचारांसाठी उपलब्ध आहेत. यात ६४० हे ऑक्सिजन बेड तर ११२ हे व्हेंटिलेटर बेड आहेत. नवापूर, तळोदा येथील उपजिल्हा रुग्णालये तसेच शहादा, धडगाव व अक्कलकुवा येथील ग्रामीण रुग्णालयांमध्ये २४ व्हेंटिलेटर्स दिले गेले असून, २९० बेड हे तैनात करण्यात आले आहेत. ग्रामीण भागातील प्राथमिक आरोग्य केंद्रातही येत्या काळात ऑक्सिजन बेड तयार होणार आहेत. धडगाव व अक्कलकुवा दुर्गम भागातील तालुक्यात ऑक्सिजन व व्हेंटिलेटर्सयुक्त बेड देण्यात आले आहेत.
नंदुरबार रुग्णालयात सर्वाधिक सुविधा
जिल्हा रुग्णालयात गेल्या काही काळात सर्वाधिक सुविधा देण्यात आल्या आहेत. एप्रिल २०२० मध्ये कोरोनाचा शिरकाव झाल्यानंतर रुग्णांना उपचार देण्यासाठी ४० बेडचा एक कक्ष होता. कालांतराने २०० बेडचे महिला रुग्णालय सुरू झाले. बेडचा विस्तार वाढून ३९० पर्यंत पोहोचला आहे. यात ८८ व्हेंटिलेटर्स, ५५० ऑक्सिजन बेडचा समावेश आहे. जिल्हा रुग्णालयासोबत ५०० खाटांचे दोन कोविड केअर सेंटर नंदुरबार शहरात सुरू होते, तसेच नागरिकांच्या सोयीसाठी कोविड उपचार रेल्वेही सुरू करण्यात आली होती. रुग्णालयात तज्ज्ञ डाॅक्टर्सचाही समावेश करण्यात येत असल्याने रुग्णांच्या उपचारांना योग्य दिशा मिळत आहे.
जिल्हा रुग्णालयासोबत जिल्ह्यातील इतर रुग्णालयांमध्ये सुविधा देण्यात येत आहे. खासगी रुग्णालयांमध्येही सुविधा वाढल्या आहेत. जिल्हा रुग्णालयात २० मेट्रिक टन क्षमतेचे ऑक्सिजन प्लांट सुरू आहेत. त्यातून ऑक्सिजन पुरवठा होऊ शकतो.
-डाॅ. के.डी.सातपुते,
अतिरिक्त जिल्हा शल्यचिकित्सक,
ऑक्सिजन काॅन्स्ट्रेटर
n जिल्ह्यात प्रथमच ऑक्सिजन काॅन्स्ट्रेटर प्राप्त झाले आहेत. सध्या जिल्हा रुग्णालयात ३६८ काॅन्स्ट्रेटर असून, जिल्ह्यात ८८६ काॅन्स्ट्रेटर लावले गेले आहेत.
n सोबत १८६ ऑक्सिजन बायपॅप व्हेंटिलेटरही लावले गेल्याची माहिती दिली गेली आहे.