शहादा तालुक्यातील वडाळी येथील बाजारपेठेत अगदी गजबजलेल्या चौकात भर दुपारी तीन वाजेच्या सुमारास आशापुरी ज्वेलर्स या सराफ दुकानात ताईत घेण्याच्या बहाण्याने दोन अनोळखी व्यक्तींनी प्रवेश केला व ताईत घेण्यासाठी ५०० रुपयांची नोट दुकानदाराला दिली व तीनशे रुपये परत घेतले. त्यात शंभर ची नोट ही जुन्या पद्धतीची द्यावी असा आग्रह केला. संबंधित दुकानदार मालकाचा मुलगा गौरव याने नोटा बदलण्यासाठी ड्राॅवर उघडल्यावर या संधीचा फायदा घेत गल्ल्यात पडलेले पाचशे रुपयांचे अंदाजे १०० नोटांचे बंडल काढण्याचा प्रयत्न करीत असताना दुकानमालक गौरव याचे लक्षात आले. त्याने चोरट्यांचा हात पकडला व वडिलांना बोलावले. त्यामुळे चोरटे मोटरसायकलवर पळून जाण्याचा प्रयत्न करू लागले. यावेळी प्रकाश सोनार व त्याचा मुलगा गौरव यांनी चोरट्यांची मोटरसायकल रोखून धरण्याचा प्रयत्न केला. त्यात ते फरफटत गेले. त्यात ते जखमी झाले. चोरटे पळून जाण्यात यशस्वी ठरले.
घटनेची माहिती पोलीस पाटील गजेंद्र गोसावी यांना कळविल्यानंतर त्यांनी तात्काळ दूरध्वनीद्वारे सारंगखेडा पोलिस स्टेशनला कळवले. पोलीस निरीक्षक राजेश शिरसाट, हवालदार विजय गावित, ठाणसिंग राजपूत व गुन्हे अन्वेषण विभागाचे किरण मोरे, विजय ओगले आदींसह कर्मचाऱ्यांनी घटनास्थळी धाव घेतली. दुकानातील सीसीटीव्ही फुटेजची पाहणी केली व संपूर्ण परिसर पोलिसांनी पिंजून काढला. चोरट्यांचे बूट आढळून आले असले तरी चोरटे पळून जाण्यात यशस्वी ठरले.
चोरट्यांची हिंमत वाढली
काही महिन्यापूर्वी सारंगखेडा येथील येथील सराफ दुकानात चोरट्यांनी धुमाकूळ घालत जबरी चोरी करण्याचा प्रयत्न केला होता. नंतर लोणखेडा, म्हसावद येथेही चोरीचा प्रयत्न केला होता. त्या घटना सीसीटीव्ही कॅमेरात कैद झाल्या होत्या. वडाळीत दोन दिवसांपूर्वी बाजारपेठेत रात्री चैतन्य ज्वेलर या सराफ हे दुकान फोडण्याचा प्रयत्न झाला होता.