गेल्या महिनाभरापासून शहरासह ग्रामीण भागात कोरोना बाधित रुग्णांची संख्या वाढली आहे. परिणामी या बाधितांवर उपचार करणाऱ्या शासकीय रुग्णालयांसह सर्व खासगी रुग्णालये हाऊसफुल्ल झाली आहेत. ग्रामीण भागात खासगी प्रॅक्टिस करणाऱ्या डॉक्टरांकडूनही कोविडच्या रुग्णांवर उपचार केले जात आहेत. कोरोना बाधितांवर उपचार करताना प्राधान्याने रेमडीसिवर इंजेक्शनचा वापर सर्रासपणे केला जात आहे. किमान सहा इंजेक्शनचा डोस बाधित रुग्णांना दिला जात आहे. मात्र, शहरातील सर्वच मेडिकल स्टोअर्समध्ये हे इंजेक्शन उपलब्ध नसल्याने मोठ्या प्रमाणात टंचाई निर्माण झाली आहे.
बाधित रुग्णांच्या नातेवाईकांना सहजपणे इंजेक्शन उपलब्ध व्हावे, यासाठी पी. के. अण्णा फाऊंडेशनमार्फत शनिवारी व रविवारी असे दोन दिवस ७७७ रुपयात इंजेक्शन उपलब्ध करून देण्यात आले. मात्र, सोमवारी या इंजेक्शनचा पुरवठा अहमदाबाद येथील कंपनीमार्फत झाला नसल्याने फाऊंडेशनमार्फत सोमवारी एकाही इंजेक्शनची विक्री केली गेली नाही. परिणामी या इंजेक्शनच्या प्राप्तीसाठी नागरिकांना वणवण भटकंती करावी लागली. अनेक ठिकाणी प्रयत्न करूनही इंजेक्शन मिळाले नसल्यामुळे बाधित रुग्णांचा जीव धोक्यात आला आहे.
इंजेक्शनच्या कृत्रिम टंचाईमुळे बाधित रुग्णांचे नातेवाईक हतबल झाले असून वाटेल त्या किमतीत इंजेक्शन घेण्यासाठी प्रयत्न करीत आहेत. याचा गैरफायदा काहींनी घेतला असून, तीन ते चार हजार रुपयांपर्यंत एका इंजेक्शनची विक्री काळ्या बाजारात होत आहे. रुग्ण अत्यवस्थ असल्याने वाटेल ती किंमत मोजण्यासाठी रुग्णाचे नातेवाईक तयार असल्याने काहींनी रुग्णांच्या नातेवाईकांना लुटण्याचे प्रकार सुरू केले आहेत. विशेष म्हणजे शहरात शासनाच्या परवानगीने चार कोविड उपचार सेंटर कार्यरत आहेत. नियमानुसार तेथे इंजेक्शनचा साठा उपलब्ध हवा. मात्र, या कोविड सेंटरच्या डॉक्टरांमार्फत रुग्णांच्या नातेवाईकांनी बाहेरून इंजेक्शन आणावे, असा अट्टाहास धरला जात असल्याने नातेवाईकांची फरपट सुरू आहे. शासनाने या कोविड सेंटरची तपासणी करावी. त्याचप्रमाणे हे इंजेक्शन सहजरित्या उपलब्ध करून द्यावे, अशी मागणी बाधित रुग्णांच्या नातेवाईकांनी केली आहे.