नंदुरबार : जिल्ह्यात विविध उपक्रम राबविण्यासाठी नेहमीच अग्रस्थानी राहणाऱ्या पुरुषोत्तमनगर ग्रामपंचायतीने लसीकरणातही बाजी मारली आहे. ४५ वर्षांवरील नागरिकांचे लसीकरण करणारी ही ग्रामपंचायत जिल्ह्यातील पहिली ग्रामपंचायत ठरली आहे.
शहादा तालुक्यातील पुरुषोत्तमनगर ग्रामपंचायतही महिला सदस्या असणारी ग्रामपंचायत म्हणून ओळखली जाते. तंटामुक्ती, ग्रामस्वच्छता यासह विविध पुरस्कार ग्रामपंचायतीला मिळाले आहेत. कोरोना लसीकरणासंदर्भात देखील या ग्रामपंचायतीने चांगले काम केले असून, १०० टक्के लसीकरण करणारी जिल्ह्यातील पहिली ग्रामपंचायत ठरली. या ग्रामपंचायतची लोकसंख्या एकूण १ हजार २२० असून, ४५ वर्षांवरील लसीकरणाचे उद्दिष्ट ३०५ होते. त्यापैकी ३५९ जणांना लसीकरण केले आहे. त्यातील १९४ जणांनी दुसरा डोसही घेतला आहे. १८ ते ४४ वयोगटांतील २८८ जणांची नोंदणी आहे. सातपुडा साखर कारखान्याचे संचालक पी. आर. पाटील यांच्सा मार्गदर्यनाखाली सरपंच ज्योतीबेन पांडुरंग पाटील, ग्रामसेवक शरद पाटील, वैद्यकीय अधिकारी डाॅ. तुकाराम गावित, डाॅ.तुषार मोरे, यांच्यासह वैशाली गडरे, इंदिरा परदेशी, किशोर खैरनार यांनी हा उपक्रम यशस्वी केला.