अर्धापूर ( नांदेड ) : गंगापूर- वैजापूर रस्त्यावर रविवारी रात्री साडेआठच्या सुमारास रस्त्यावर उभ्या नादुरुस्त ट्रकवर ( एमएच.०४ ईबी.६७१२) अर्धापूर येथून शिर्डीला जाणारी कार ( एमएच. ४६, डब्लू ७७३१ ) पाठीमागून धडकली. त्याचवेळी नाशिकहून औरंगाबादकडे जाणारी कार ( एम.एच २० एफ.जी. ०४०२ ) ही अपघातग्रस्त कारला धडकली. एकामागून एक दोन कार धडकून झालेल्या अपघातात एक ठार तर नऊ जण जखमी झाले. डॉ. कैलास हेंबाडे ( मनाठकर ) असे मृताचे नाव आहे.
तालुक्यातील पार्डी म. येथे आरोग्य सेवा देत विविध सामाजिक कार्यात सक्रीय सहभाग घेणारे डॉ. कैलास हेंबाडे ( मनाठकर ) हे शिर्डी येथे साईबाबांच्या दर्शनासाठी जात असताना त्यांचे अपघातात दुर्दैवी निधन झाले. सदर अपघात गंगापूर- वैजापूर रस्त्यावर रविवारी रात्री साडेआठच्या सुमारास घडला. जखमींना उपचारासाठी रुग्णालयात नेले असता त्यापैकी डॉ. कैलास हेंबाडे ( ४५ ह.मु पार्डी ता.अर्धापूर ) यांना डॉक्टरांनी मृत घोषित केले. गोविंद शंकर भांगे व मुलगा साईनाथ गोविंद भांगे, सूर्यकांत बंडाळे व मुलगा प्रेम सूर्यकांत बंडाळे, करन दिनकर पवार, प्रदीप बसवंते आदी जखमी झाले.