उमरी ( नांदेड) : तालुक्यातील कळगाव येथील एकाच कुटुंबातील सात जणांना गुरुवारी जेवणातून विषबाधा झाली. यातील एकाचा उपचारा दरम्यान मृत्यू झाला असून इतर सहा जणांची प्रकृती अस्वस्थ आहे. अधिक उपचारासाठी चार जणांना नांदेडला हलविण्यात आले आहे.
कळगाव येथे गुरुवारी सकाळी कदम कुटुंबाने जेवण केले. यानंतर कुटुंबातील सर्वांनाच चक्कर, मळमळ होणे सुरू झाले. काही वेळातच उलट्या व जुलाब होऊ लागल्याने सर्वांना उमरी येथील ग्रामीण रुग्णालयात दाखल करण्यात आले. यावेळी उपचारा दरम्यान कोंडीबा गंगाराम कदम यांचा मृत्यू झाला. तर पदमीनबाई मारुती कदम ( ५५) , आनंदा कोंडीबा कदम ( ३५) , कल्पना आनंदा कदम ( २८), श्लोक आनंदा कदम (४ ), संभाजी सोपान शिंदे ( ५५), भागनबाई कदम ( ६५) यांच्यावर उपचार सुरु आहेत.