- सुनील चौरेहदगाव : अनैतिक संबंधातून एका युवकाचा खून केल्याची घटना तालुक्यातील बरड शेवाळा शिवारामध्ये १५ ऑगस्ट रोजी रात्री १०.३० च्या सुमारास घडली आहे. अरविंद देवराव नरवडे (४१, राखरबी ता. हदगाव) असे मयत युवकाचे नाव आहे.
पोलीस सूत्रांकडून मिळालेली माहिती अशी, तालुक्यातील खरबी येथील अरविंद याचे बरड शेवाळा येथील एका महिलेसोबत अनैतिक संबंध होते. महिलेच्या पतीला या संबंधांची कुणकुण लागली होती. त्यातूनच १५ ऑगस्ट रोजी सकाळी पतीने पत्नीला मारहाण केली. महाराणीनंतर पत्नीने तिच्या प्रियकराला मारहाण झाल्याची माहिती दिली. त्यामुळे अरविंद नरवडे हा १५ ऑगस्ट रोजी रात्री महिलेच्या घरी आला होता. त्याचवेळी पती आणि इतर दोघांनी अरविंद नरवडे यास जबर मारहाण केली. त्यात त्याचा मृत्यू झाला.
याप्रकरणी मनाठा पोलीस ठाण्यात खुनाचा गुन्हा दाखल करण्यात आला आहे. पोलिसांनी आरोपी पती आणि इतर दोन आरोपींना ताब्यात घेतले आहे. घटनेनंतर उपविभागीय पोलिस अधिकारी शफकत आमना, सहायक पोलीस निरीक्षक संतोष शेकडे आदींनी घटनास्थळी भेट दिली. हदगाव पोलीस घटनेचा तपास करत आहेत.